ოზურგეთში დააფიქსირეს შემთხვევა, სადაც თურმე, კომისიის წევრმა ამომრჩეველი გადაკოცნა. ამ დონეზე უზრუნველყოფენ საჩივრების წერას, რომ საჩივარი ბევრი იყოს, ასეთი მდაბიო "ფეიკ" კამპანიით ცდილობენ ისინი პროვოკაციის მოწყობას თუ ფონის შექმნას, თითქოს, რაღაც სერიოზული ხდება, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
როგორც მან აღნიშნა, სადაც „ნაციონალური მოძრაობის“ კუთვნილი მედია გამოჩნდება, იქ აპოკალიფსური სურათი იხატება, თუმცა, მან ამომრჩევლებს მოუწოდა, მაქსიმალურად დაამშვიდონ სიტუაცია და პროვოკაციებზე არ წამოეგონ.
„სადაც არ არის „ნაციონალური მოძრაობის“ მედიასაშუალებები, იქ ყველაფერი ნორმალურად მიდის. სადაც გამოჩნდებიან ხოლმე „ნაცმედიის“ წარმომადგენლები, იქ იხატება აპოკალიფსური სურათი. მაგრამ, ქართველი ამომრჩეველი ამაში არ გაეხვევა.
ყველას დაბეჯითებით ვთხოვ, რომ არანაირი პროვოკაცია და ვიღაცის გადაცდომა არ არის იმის საფუძველი, რომ ჩვენ ამ პროვოკაციაზე წამოვეგოთ. ჩვენ უნდა დავაწყნაროთ სიტუაცია, ჩვენი ამომრჩევლის დონეზეც კი ყველას ვთხოვ, რომ დავაწყნაროთ, დავამშვიდოთ მაქსიმალურად სიტუაცია“, - აღნიშნა მამუკა მდინარაძემ.
მისივე თქმით, საჭიროა მაქსიმალური აქტივობა, რადგან, „ქართული ოცნების“ ამომრჩევლის 5 ან 10 პროცენტი თუ გადაწყვეტს სახლში დარჩენას, აბსოლუტურად განსხვავებული სურათი დაიხატება, ვინაიდან, აქ საუბარია ასიათასობით ადამიანზე.
„ყველაფერი ძალიან კარგად მიდის. მაქსიმალური აქტივობა, რომ ერთი ადამიანიც არ დარჩეს სახლში, იმიტომ, რომ ჩვენი ამომრჩევლის 5-10-მა პროცენტმა რომ იფიქროს,მოდი, მე სახლში დავრჩები - ამით შეიძლება აბსოლუტურად განსხვავებული სურათი მივიღოთ, იმიტომ, რომ აქ საუბარია ასიათასობით ადამიანზე, სხვა პარტიების მხარდამჭერებისგან განსხვავებით. უნდა გავითვალისწინოთ, რომ ეს არის რეფერენდუმი ქართულ, ეროვნულ, ტრადიციულ ღირებულებებს და ამორალურობას შორის“, - განაცხადა მამუკა მდინარაძემ.
შეგახსენებთ, დღეს, 26 ოქტომბერს, საქართველო XI მოწვევის პარლამენტს ირჩევს. ქვეყნის ისტორიაში ეს პირველი საპარლამენტო არჩევნებია, რომელიც სრულად პროპორციული სისტემით ჩატარდება - პარლამენტის 150-ვე მანდატი პროპორციული წესით იმ საარჩევნო სუბიექტებს შორის განაწილდება, ვინც 5%-იან საარჩევნო ბარიერს გადალახავს. ასევე პირველად, 26 ოქტომბრის საპარლამენტო არჩევნები ელექტრონული არჩევნებია, სადაც ამომრჩეველთა დაახლოებით 90% ხმას ელექტრონული მოწყობილობების მეშვეობით აძლევს. ამომრჩეველთა საერთო რაოდენობა 3 508 294-ს შეადგენს. ელექტრონული ტექნოლოგიების გამოყენებით კი არჩევნებში 3 113 747 ამომრჩეველი მიიღებს მონაწილეობას.
2024 წლის საპარლამენტო არჩევნებში 18 საარჩევნო სუბიექტი მონაწილეობს.
ცენტრალური საარჩევნო კომისიის ინფორმაციით, 2024 წლის საპარლამენტო არჩევნებს საერთაშორისო ორგანიზაციის 1700-ზე მეტი და ადგილობრივი ორგანიზაციის 23 000-ზე მეტი დამკვირვებელი აკვირდება. საარჩევნო პროცესს დააკვირდება 76 საერთაშორისო ორგანიზაციის 1700-ზე მეტი დამკვირვებელი, 111 ადგილობრივი ორგანიზაციის 23 000-ზე მეტი დამკვირვებელი, ასევე პროცესს გააშუქებს 199 მედია ორგანიზაციის 2800-ზე მეტი წარმომადგენელი. ჯამში წელს საპარლამენტო არჩევნებს 24 700 ქართველი და უცხოელი დამკვირვებელი აკვირდება.
2024 წლის 26 ოქტომბერს საქართველოში ყველაზე ძვირად ღირებული არჩევნებიცაა. წელს საარჩევნო ადმინისტრაციის ბიუჯეტი 171 მილიონი ლარია, საიდანაც უშუალოდ არჩევნების ჩატარების ღონისძიებები 126.5 მილიონი ლარი ჯდება. ამ თანხიდან 54 მილიონი ლარი ხმის მიცემის ელექტრონული აპარატების შესყიდვაზე დაიხარჯა, რაც კომპანია Smartmatic-თან გაფორმებული კონტრაქტის საფუძველზე მოხდა. ხელფასებზე კი წელს ცესკოში 42.7 მილიონი ლარის ხელფასების გაცემა იგეგმება, რაც არასაარჩევნო 2023 წელთან შედარებით ორჯერ მეტია.
მაღალი რანგის პოლიტიკოსებიდან ხმა უკვე მისცეს:
"ქართული ოცნების“ საპატიო თავმჯდომარემ, ბიძინა ივანიშვილმა
გარემოს დაცვისა და სოფლის მეურნეობის მინისტრმა.
ეკონიმიკისა და მდგრადი განვითარების მინისტრმა.
პოლიტიკური პარტიების ლიდერებმა და პოლიტიკურად აქტიურმა მოქალაქეებმა:
გიორგი გახარიამ (ყოფილმა პრემიერ-მინისტრმა)
ნიკა გვარამიამ (ყოფილმა პროკურორმა)
გიორგი მარგველაშვილმა (ყოფილმა პრეზიდენტმა)
