2026 წელს საფრანგეთში ქლიავის კარგი მოსავალია მოსალოდნელი. ახალი ხილის ბაზრისთვის წარმოების მოცულობა 56 000-დან 58 000 ტონამდე იქნება, რაც ნორმალური მოსავლის დაახლოებით 90 პროცენტს შეადგენს.
სექტორის წარმომადგენლებმა წლიური პროგნოზი გამოფენა medFEL-ზე წარადგინეს. მოსალოდნელი მაჩვენებელი თითქმის შეესაბამება 2025 წლის შედეგს, როდესაც საფრანგეთში 54 000-დან 58 000 ტონამდე ქლიავი აწარმოეს.
ქვეყნის უმეტეს რეგიონში ყვავილობისთვის ხელსაყრელი პირობები იყო. ხანგრძლივმა წვიმამ გარკვეული გავლენა მოახდინა ადრე მოყვავილე ჯიშებზე, მათ შორის African Rose-ზე, თუმცა გაზაფხულის ყინვებს ბაღებისთვის მნიშვნელოვანი ზიანი არ მიუყენებია.
სამხრეთ-დასავლეთ საფრანგეთში მოსავალი ნორმალური მაჩვენებლის დაახლოებით 90 პროცენტი იქნება. სამხრეთ-აღმოსავლეთში წარმოების პოტენციალი 100 პროცენტს აღწევს, ნაყოფის ზომა და ხარისხი კი კარგია.
აღმოსავლეთ საფრანგეთში, ლორენის რეგიონში, მოსავალი სრული პოტენციალის 70-დან 80 პროცენტამდე იქნება. შემცირების მიზეზია ბუნებრივი პერიოდულობა, რაც წინა წლების უხვ მოსავალს უკავშირდება.
საფრანგეთის ქლიავის მწარმოებელთა ასოციაციის წარმომადგენლის, ჟერომ კაპელის განცხადებით, გაზაფხულის ყინვებისა და სხვა მნიშვნელოვანი მეტეოროლოგიური ზიანის არარსებობა ფერმერებს საშუალებას აძლევს, შედარებით ადრეულ და მაღალი ხარისხის მოსავალს ელოდონ.
მიუხედავად დადებითი პროგნოზისა, მწარმოებლებს ფინანსური წნეხი ემუქრებათ. ენერგიის, ლოგისტიკის, სასუქებისა და ტრანსპორტირების გაძვირების გამო წარმოების ხარჯები 2024 წლიდან 15 პროცენტზე მეტად გაიზარდა.
ფერმერთა მომგებიანობის შესანარჩუნებლად სექტორი საბითუმო და საცალო პარტნიორებს შესასყიდი ფასების გაზრდისკენ მოუწოდებს. ასოციაციის შეფასებით, სეზონის დასაწყისში 50 ზომის წითელი ქლიავის საწყისი საბითუმო ფასი, ხუთკილოგრამიანი შეფუთვის შემთხვევაში, კილოგრამზე დაახლოებით 2.07 ევრო უნდა იყოს.
მწარმოებლების ერთ-ერთი მთავარი მიზანია, ქლიავი სპონტანურად შეძენილი პროდუქტიდან მომხმარებლის წინასწარ დაგეგმილ შენაძენად იქცეს. ამისთვის საცალო ქსელებში უფრო თვალსაჩინო განლაგება, პროდუქციის ფერის მიხედვით დაყოფა და დაცული წარმოშობისა და ეკოლოგიურად პასუხისმგებელი წარმოების ნიშნების წარმოჩენა იგეგმება.
საფრანგეთის ქლიავის მწარმოებელთა ასოციაციამ საცალო ქსელ Coopérative U-სთან ახალი პარტნიორობაც გამოაცხადა. შეთანხმების მიხედვით, ქსელში გაყიდული ქლიავის 95 პროცენტი ფრანგული წარმოების იქნება, ხოლო 80 პროცენტი „ეკოლოგიურად პასუხისმგებელი ბაღებიდან“ შევა.
ასოციაცია 36 წევრ კომპანიას აერთიანებს და დაახლოებით 30 000 ტონა ქლიავის წარმოებას, ანუ საფრანგეთის მთლიანი მოსავლის დაახლოებით 60 პროცენტს წარმოადგენს.
