საფრანგეთის ბოსტნეულის მწარმოებლები აფრთხილებენ, რომ ქვეყანას შესაძლოა მალე პროდუქციის მნიშვნელოვანი დეფიციტი შეექმნას. მიზეზი სამი ძლიერი სიცხის ტალღაა, რომელმაც ღია გრუნტზე მოყვანილი კულტურები მნიშვნელოვნად დააზიანა.
მწარმოებელთა ასოციაცია Légumes de France-ის ინფორმაციით, მდგომარეობა უკვე კრიტიკულია და შესაძლოა შიდა ბაზარზე ბოსტნეულის მიწოდების მკვეთრი შემცირება გამოიწვიოს.
ყველაზე მეტად დაზიანდა ხახვი, ნიორი, შალოტი, სტაფილო, პრასი და სალათის ფოთოლი. სექტორის წარმომადგენლები ზარალს ათასობით ტონად აფასებენ, ხოლო ზოგიერთი კულტურის შემთხვევაში დანაკარგმა შესაძლოა წლიური მოსავლის 50 პროცენტს მიაღწიოს.
ასოციაციის შეფასებით, მიმდინარე სეზონი საფრანგეთის ბოსტნეულის სექტორისთვის ერთ-ერთი ყველაზე რთულია. ბევრ მეურნეობას უკვე რამდენიმე მილიონი ევროს ზარალი აქვს. ზოგიერთი მწარმოებელი შესაძლოა საქმიანობის დროებით შეჩერების ან ბაზრიდან გასვლის აუცილებლობის წინაშე აღმოჩნდეს.
Légumes de France-მა საფრანგეთის მთავრობას ყველაზე მეტად დაზარალებული მეურნეობებისთვის გადაუდებელი ფინანსური დახმარების გამოყოფისკენ მოუწოდა.
ვითარებას წყლის დეფიციტიც ამძიმებს. ხანგრძლივი გვალვის გამო ფერმერები განადგურებული კულტურების ხელახლა დარგვას ან ახალი ნათესების გაშენებას ვერ ახერხებენ. ამინდის პროგნოზიც მდგომარეობის სწრაფ გაუმჯობესებაზე არ მიუთითებს.
პრობლემა შესაძლოა უახლოეს კვირებში საფრანგეთის სუპერმარკეტებშიც გამოჩნდეს, სადაც ზოგიერთი ბოსტნეულის დეფიციტია მოსალოდნელი.
ადგილობრივი წარმოების იმპორტით ჩანაცვლებაც რთული იქნება, რადგან მაღალი ტემპერატურა და გვალვა ევროპის სხვა ქვეყნებშიც აზიანებს მოსავალს. შედეგად, რეგიონულ ბაზარზე შესაძლოა მიწოდება კიდევ უფრო შემცირდეს და ფასებზე ზეწოლა გაიზარდოს.
მწარმოებელთა ასოციაცია საცალო ქსელებს ბოსტნეულის გარეგნულ სტანდარტებთან დაკავშირებული მოთხოვნების შემსუბუქებისკენაც მოუწოდებს. ფერმერების განმარტებით, მცირე ვიზუალური დეფექტები პროდუქტის გემოს, კვებით ღირებულებასა და უსაფრთხოებაზე გავლენას არ ახდენს.
მათი შეფასებით, ასეთი პროდუქციის დაწუნება მხოლოდ გაზრდის საკვების დანაკარგს, გაამწვავებს დეფიციტს და დამატებით ზარალს მიაყენებს უკვე რთულ მდგომარეობაში მყოფ ფერმერებს.
არსებული ვითარება აჩვენებს, რომ ევროპის ბოსტნეულის სექტორი სულ უფრო დაუცველი ხდება ხანგრძლივი სიცხის, წყლის დეფიციტისა და არასტაბილური ამინდის მიმართ.
წყარო: "ისთ ფრუთი"
