კაცობრიობის საქმიანობის შედეგად გამოყოფილი ნახშირორჟანგი (CO2) პლანეტას ათბობს და სიცოცხლეს არაკომფორტულს ხდის, ზოგიერთ რეგიონში კი სრულიად გაუსაძლისს. ივლისში, პლანეტაზე ზედიზედ დაფიქსირდა ყველაზე ცხელი დღეები აღრიცხულთა შორის.
სათბურის აირთა ემისიები NASA-მ რუკაზე დაიტანა. ვიდეო შთამბეჭდავია და შეიძლება, კიდევ ერთხელ დაგვაფიქროს, რამდენად აუცილებელია კლიმატის ცვლილებასთან ბრძოლა.
NASA-ს სამეცნიერო ვიზუალიზაციის სტუდია აქვეყნებს ვიდეოს, რომელიც ასახავს, როგორ გადააქვს ქარსა და ჰაერის ნაკადებს გამოყოფილი CO2 დედამიწის ატმოსფეროს გარშემო 2020 წლის იანვრიდან მარტამდე პერიოდში. ვიდეო მაღალი რეზოლუციისაა და აჩვენებს ნახშირორჟანგის ცალკეულ წყაროებსაც, მათ შორის ელექტროსადგურებს და ტყის ხანძრებს.
„ჩვენ, როგორც პოლიტიკოსები და მეცნიერები, ვცდილობთ, გავითვალისწინოთ, საიდან მოდის ნახშირბადი და რა გავლენას ახდენს ის პლანეტაზე. აქ თქვენ ხედავთ, ყველაფერი როგორ ერთმანეთთან არის გადახლართული ამინდის სხვადასხვა მახასიათებელთა მიერ“, — ამბობს NASA-ს კლიმატური მეცნიერი ლესლი ოტი.
ვიდეოში მკაფიოდ ჩანს, რომ არ აქვს მნიშვნელობა, საიდან მოდის ნახშირორჟანგის ემისია, შედეგებს მაინც ყველა ვიმკით. თუმცა, მაინც არსებობს გარკვეული გლობალური განსხვავებები.
მომზადებულია Universe Today-ს მიხედვით.
ვრცლად 1tv.ge-ზე
