საფრანგეთის პრეზიდენტის ემანუელ მაკრონის განცხადებით, საფრანგეთი საუდის არაბეთში სამხედრო ძალებსა და თავდაცვის სისტემებს გაგზავნის, რათა წითელი ზღვის საპორტო ქალაქი იანბუ დაიცვას, რომელსაც ენერგეტიკის ტრანსპორტირებისთვის საკვანძო მნიშვნელობა აქვს.
მაკრონის თქმით, ზამთრის მოახლოებასთან ერთად საფრანგეთს გაზისა და ნავთობის ადეკვატური მარაგი გააჩნია, ხოლო პარიზი აქტიურად განაგრძობს მუშაობას მიწოდების უწყვეტობის უზრუნველსაყოფად.
ნედლი ნავთობის ფასები ბოლო პერიოდში მკვეთრად გაიზარდა, რადგან საუდის არაბეთის ნავთობის ექსპორტის ძირითადი ალტერნატიული მარშრუტი იანბუს გავლით ირანის მიერ მხარდაჭერილი ჰუსიტების მხრიდან სარაკეტო თავდასხმების სამიზნე გახდა.
"ჩვენ ვაგზავნით სამხედრო რესურსებს, კერძოდ, სამხედროებს, რადარულ სისტემებსა და თავდაცვის საშუალებებს ამ ობიექტის დასაცავად და არა – რომელიმე კონფლიქტში." - განუცხადა მაკრონმა მედიას.
ამასთან, საერთაშორისო ვითარებასთან დაკავშირებით ტელევიზიაში გამართულ ვრცელ ინტერვიუში მაკრონმა გააჟღერა გაფრთხილება საფრანგეთის ტერიტორიაზე შესაძლო რუსული თავდასხმების შესახებ.
მაკრონმა უარყო ესპანური გაზეთის, El Mundo-ს ინფორმაცია იმის შესახებ, რომ აშშ-ს ცენტრალურმა სადაზვერვო სააგენტომ ევროპულ მთავრობებს ხმელთაშუა ზღვის მხრიდან შესაძლო დრონების თავდასხმის საფრთხის თაობაზე აცნობა.
მისი თქმით, ცენტრალურ სადაზვერვო სააგენტოს საფრანგეთის შესაბამისი სამსახურებისთვის მსგავსი ინფორმაცია არ მიუწოდებია.
მიუხედავად ამისა, მაკრონის განცხადებით, რუსეთი აძლიერებს მტრულ და კრიმინალურ ქმედებებს ევროპული ქვეყნების წინააღმდეგ და საფრანგეთი შესაძლოა იმგვარი დარტყმების წინაშე აღმოჩნდეს, როგორიც ლაიფციგში აღკვეთილი თავდასხმა იყო.
გასულ კვირას მაკრონმა ელისეს სასახლეში ფრანგული პარტიების ლიდერები შეკრიბა, რათა მათთვის რუსეთის მხრიდან მომდინარე მზარდი საფრთხის შესახებ ინფორმაცია მიეწოდებინა. მოგვიანებით მან განაცხადა, რომ მთავრობას დაავალა, შეემუშავებინა გეგმა კრიტიკული ინფრასტრუქტურის დრონებისა და კიბერთავდასხმებისგან დასაცავად.
მაკრონის თქმით, მოსკოვი ცდილობს ევროპის დაშინებას და უკრაინის მხარდაჭერის პროცესში კონტინენტის ურყევი ნების გატეხვას.
რუსეთი აცხადებს, რომ ევროპის ბრალდებები ჰიბრიდული თავდასხმების შესახებ უსაფუძვლოა და ანტირუსული ისტერიის შედეგია.
ცნობისთვის, საფრანგეთმა ეროვნული უსაფრთხოების მოტივით, ევროკავშირის სანქციებიდან რუსულ-უზბეკური წარმოშობის მეტალურგიული მაგნატი ალიშერ უსმანოვი გაათავისუფლებინა. ამ ნაბიჯმა აზერბაიჯანს ჯაშუშობის ბრალდებით გასამართლებული საფრანგეთის მოქალაქის შეწყალებისკენ უბიძგა.
მედიის ცნობით, საფრანგეთის მოქალაქის გათავისუფლება საფრანგეთსა და აზერბაიჯანს შორის უფრო ფართო შეთანხმების ნაწილია, რომელიც რუსეთთან დაკავშირებული მილიარდერის, ალიშერ უსმანოვის, ევროკავშირის სანქციების სიიდან ამოღებას უკავშირდება.
