უნგრეთის ხელისუფლებამ სპეციალური მიმართვა გაავრცელა და მოქალაქეებს მოუწოდა, ეფექტური ფოტოების გადასაღებად მინდვრებში დატოვებულ თივისა და ჩალის რულონებზე არ ავიდნენ. მსგავსი ფოტოსესიები ზაფხულში უნგრულ სოციალურ ქსელებში განსაკუთრებით პოპულარული გახდა.
ერთი შეხედვით უწყინარი გართობა შესაძლოა ადამიანებისთვის სახიფათო აღმოჩნდეს და ფერმერებს მნიშვნელოვანი ფინანსური ზიანიც მიაყენოს. სოფლის მეურნეობის სამინისტროს განცხადებით, რულონები სათამაშო მოედანი არ არის. თითოეული მათგანის წონამ შეიძლება 800 კილოგრამს ან მეტსაც მიაღწიოს. გადაადგილების ან დაგორების შემთხვევაში ასეთმა რულონმა მძიმე, მათ შორის სასიკვდილო ტრავმებიც შეიძლება გამოიწვიოს.
სამინისტრო განმარტავს, რომ თივისა და ჩალის შეკვრები დეკორაცია კი არა, ფერმერების მთელი წლის შრომის შედეგია. მათზე ასვლისას შესაძლოა დაზიანდეს ბადე ან თოკი, რომლითაც რულონია შეკრული. შედეგად ის სიმკვრივეს დაკარგავს, შიგნით ტენი შეაღწევს და ცხოველებისთვის განკუთვნილი საკვები დაობდება.
ერთი რულონის დაზიანებამ ფერმერს რამდენიმე ასეული ევროს ზარალიც შეიძლება მოუტანოს.
თივა ზამთარში ძროხების, ცხვრების, ცხენებისა და სხვა სასოფლო-სამეურნეო ცხოველების გამოსაკვებად გამოიყენება, ჩალა კი ძირითადად მათი სადგომების დასაფენადაა განკუთვნილი.
უნგრეთის სოფლის მეურნეობის სამინისტრო მოქალაქეებს მოუწოდებს, ბუნებაში ფოტოების გადაღებისას სიფრთხილე გამოიჩინონ და პატივი სცენ იმ ადამიანების შრომას, რომლებიც მოსახლეობისთვის საკვებს, ცხოველებისთვის კი საკვებ მარაგს ამზადებენ.
