ამერიკელების ნახევარზე მეტი შიშობს, რომ AI სამუშაო ადგილებს შეამცირებს
ხელოვნური ინტელექტის სწრაფი განვითარება აშშ-ში დასაქმებასთან დაკავშირებულ შიშებს აძლიერებს. Reuters/Ipsos-ის ახალი სოციოლოგიური კვლევის მიხედვით, ამერიკელთა 53% შიშობს, რომ AI-ის განვითარებამ შესაძლოა მათ ან მათი ოჯახის წევრებს სამუშაო ადგილი დააკარგვინოს.
კვლევის შედეგები აჩვენებს, რომ ეს შიში საზოგადოების სხვადასხვა ჯგუფში თითქმის თანაბრად არის გავრცელებული. რესპონდენტების ნაწილი ხელოვნურ ინტელექტს ტექნოლოგიურ პროგრესად აღიქვამს, თუმცა დასაქმების ბაზარზე მისი გავლენა ბევრისთვის გაურკვევლობასა და რისკებთან ასოცირდება. გამოკითხულთა 37% მიიჩნევს, რომ AI მათ ან მათი ოჯახის წევრების სამუშაო ადგილებს საფრთხეს არ შეუქმნის, ხოლო 10%-მა პოზიციის დაფიქსირებისგან თავი შეიკავა.
საზოგადოებრივი სკეპტიციზმი ხელოვნური ინტელექტის მასობრივ დანერგვასთან დაკავშირებით იზრდება. კვლევის მიხედვით, ამერიკელთა 73% AI-ის სწრაფი გავრცელების მიმართ უარყოფით ან შეშფოთებულ დამოკიდებულებას გამოხატავს. შედარებისთვის, წინა წელს ანალოგიური განწყობა მოსახლეობის 68%-ს ჰქონდა.
AI-ის მიმართ შიშები პოლიტიკური კუთვნილების მიხედვითაც განსხვავდება. დემოკრატების 61% მიიჩნევს, რომ ხელოვნურმა ინტელექტმა შესაძლოა მათ ოჯახებში სამუშაო ადგილების შემცირება გამოიწვიოს. რესპუბლიკელებს შორის ეს მაჩვენებელი შედარებით დაბალია და 47%-ს შეადგენს.
კვლევა აჩვენებს იმასაც, რომ AI-ის გამოყენება უფრო გავრცელებულია უმაღლესი განათლების მქონე მოქალაქეებში. კოლეჯდამთავრებულთა 50% ხელოვნურ ინტელექტს რეგულარულად იყენებს, მაშინ როცა აკადემიური ხარისხის არმქონე რესპონდენტებში ეს მაჩვენებელი 34%-ია. მთლიანობაში, ამერიკელთა 40% ამბობს, რომ AI-ის ინსტრუმენტებს ყოველდღიურობაში რეგულარულად იყენებს.
საზოგადოებრივი მღელვარება განსაკუთრებით იმ ფონზე იზრდება, როდესაც მსხვილი კომპანიები ხელოვნური ინტელექტის დანერგვას ხარჯების შემცირებისა და სამუშაო პროცესების ავტომატიზაციის საშუალებად განიხილავენ. ბოლო პერიოდში არაერთმა კომპანიამ დააანონსა რეორგანიზაცია ან სამუშაო ადგილების შემცირება, რაც ტექნოლოგიური პროგრესის ეკონომიკურ ფასზე დისკუსიას კიდევ უფრო აძლიერებს.
Reuters/Ipsos-ის გამოკითხვა ივნისში ჩატარდა და მასში აშშ-ის 4 531 სრულწლოვანი მოქალაქე მონაწილეობდა. კვლევის ავტორების ცნობით, ცდომილების ზღვარი 2 პროცენტული პუნქტია.
