ანაკლიის ღრმაწყლოვანი პორტის პროექტი განვითარების ახალ ეტაპზე გადადის. ეკონომიკის მინისტრის განცხადებით, პროექტი ე.წ. Landlord-ის მოდელით განხორციელდება, რაც პორტის განვითარებასა და მართვაში სახელმწიფოსა და კერძო ინვესტორის ფუნქციების მკაფიო გამიჯვნას ითვალისწინებს.
ახალი მოდელის მიხედვით, სახელმწიფო პორტის მიწისა და ძირითადი ინფრასტრუქტურის მფლობელად რჩება. მის პასუხისმგებლობაში იქნება ტალღმჭრელების მშენებლობა, აკვატორიის დაღრმავება და საგზაო-სარკინიგზო ინფრასტრუქტურის განვითარება. კერძო ოპერატორი კი პორტის ტერიტორიას გრძელვადიანი იჯარით მიიღებს და ინვესტიციას განახორციელებს ტერმინალებში, ამწეებში, საწყობებსა და სხვა საოპერაციო ინფრასტრუქტურაში. ამასთან, სწორედ ის იქნება პასუხისმგებელი ტვირთბრუნვის, ოპერირების და კომერციული საქმიანობის მართვაზე.
ექსპერტების შეფასებით, Landlord-ის მოდელის მთავარი უპირატესობაა, რომ სახელმწიფო ინარჩუნებს კონტროლს სტრატეგიულ ობიექტზე, ხოლო პორტის ოპერირებას საერთაშორისო გამოცდილების მქონე კერძო კომპანია უზრუნველყოფს. ამასთან, რისკებიც ნაწილდება — სახელმწიფო აფინანსებს საბაზისო ინფრასტრუქტურას, ხოლო კომერციულ რისკს კერძო ინვესტორი იღებს.
თუმცა, მოდელს გამოწვევებიც ახლავს. მათ შორისაა სახელმწიფოს მხრიდან მნიშვნელოვანი საწყისი კაპიტალდაბანდება და ეფექტიანი რეგულირების აუცილებლობა, რათა ოპერატორმა ხელშეკრულებით ნაკისრი ვალდებულებები სრულად შეასრულოს.
ანალიტიკოსების შეფასებით, არსებული გეოპოლიტიკური გარემოს ფონზე Landlord-ის მოდელი ანაკლიისთვის ერთ-ერთ ყველაზე ოპტიმალურ გადაწყვეტილებად მიიჩნევა. „შუა დერეფნის“ მზარდი მნიშვნელობის პირობებში, პორტს შეუძლია ჩინეთიდან, ცენტრალური აზიიდან და კავკასიის გავლით ევროპისკენ მიმავალი ტვირთების მნიშვნელოვანი ნაწილი მოიზიდოს. სპეციალისტების აზრით, ამ მოდელით იზრდება მსხვილი საერთაშორისო ოპერატორების დაინტერესების შანსიც, რადგან სახელმწიფო თავად უზრუნველყოფს ძირითადი ინფრასტრუქტურის შექმნას.
გარდა ამისა, Landlord-ის სისტემა ფართოდ გამოიყენება ევროპაში, რაც პროექტისთვის საერთაშორისო საფინანსო ინსტიტუტების მხარდაჭერის მოზიდვის შესაძლებლობასაც აძლიერებს. ექსპერტები ასევე აღნიშნავენ, რომ ეს მოდელი სახელმწიფოს საშუალებას აძლევს, შეინარჩუნოს სტრატეგიული კონტროლი პორტზე, მაშინ როდესაც ოპერატორის შერჩევა კონკურენტულ საფუძველზე სხვადასხვა ქვეყნის კომპანიებს შორის იქნება შესაძლებელი.
სპეციალისტების შეფასებით, პროექტის წარმატება დამოკიდებული იქნება იმაზე, რამდენად სწრაფად განხორციელდება სახელმწიფო ინფრასტრუქტურული სამუშაოები და რამდენად ძლიერი საერთაშორისო პარტნიორი შეირჩევა ანაკლიის პორტის ოპერირებისთვის.
