საქართველოს საბანკო სექტორში ბიზნეს დაკრედიტების ყველაზე დიდი მოცულობა კვლავ უძრავი ქონების დეველოპმენტზე მოდის. ეროვნული ბანკის სტატისტიკის მიხედვით, 2026 წლის ივლისის ბოლოს ამ სექტორზე გაცემული სესხების პორტფელი დაახლოებით 5.09 მილიარდ ლარს შეადგენდა.
წლიურად დეველოპმენტის სექტორის დაკრედიტება 19%-ით გაიზარდა, რაც მთლიანად ბიზნეს სესხების ზრდის ტემპს აღემატება. ამავე პერიოდში კომერციულ სექტორზე გაცემული სესხების საერთო მოცულობამ 47.7 მილიარდ ლარს მიაღწია, რაც ერთი წლის წინანდელ მაჩვენებელზე 12.1%-ით, ანუ დაახლოებით 5.16 მილიარდი ლარით მეტია.
მეორე ადგილზე სერვისების სექტორია, რომლის საკრედიტო პორტფელი 4.54 მილიარდ ლარს შეადგენს. მას მცირე სხვაობით მოსდევს უძრავი ქონების მენეჯმენტი, 4.51 მილიარდი ლარით. ამ სექტორის დაკრედიტება წლიურად 26%-ით გაიზარდა. სოფლის მეურნეობის სესხების მოცულობა 3.9 მილიარდ ლარს აღწევს, ხოლო ენერგეტიკის სექტორში დაკრედიტება 30%-ით, 3.18 მილიარდ ლარამდე გაიზარდა.
მნიშვნელოვანი ზრდა დაფიქსირდა სამომხმარებლო საქონლით ვაჭრობაშიც, სადაც საკრედიტო პორტფელი 20%-ით, 2.88 მილიარდ ლარამდე გაიზარდა. საპირისპირო დინამიკაა სასტუმროებისა და ტურიზმის სექტორში, სადაც სესხების მოცულობა წლიურად 15%-ით შემცირდა და 2.78 მილიარდი ლარი შეადგინა.
ეროვნული ბანკის მონაცემები აჩვენებს, რომ უძრავ ქონებასთან დაკავშირებულ ორ ძირითად მიმართულებაზე, დეველოპმენტსა და ქონების მენეჯმენტზე, ჯამურად დაახლოებით 9.6 მილიარდი ლარის საბანკო სესხია გაცემული. ეს ბიზნეს დაკრედიტებაში უძრავი ქონების სექტორის მაღალი წილის შენარჩუნებაზე მიუთითებს.
