დღის დოპ 10 საინტერესო სიახლე

1. სარფთან რიგში მდგომი ტრაილერების კოლონის სიგრძე 25 კმ-ს აღწევს

რუსეთ-უკრაინის ომი ეკონომიკურ განვითარებას მთელს მსოფლიოში, განსაკუთრებით კი რეგიონში ანელებს. გამონაკლისი არც საქართველოა. სხვადასხვა საერთაშორისო ორგანიზაციამ ქვეყანას პროგნოზირებული მშპ-ის ზრდის ტემპი 5-6 პროცენტიდან 2-3 პროცენტამდე შეუმცირა, უკვე მარტში ექსპორტი რუსეთში 56%-ით, ხოლო უკრაინაში 94%-ით შემცირდა, რითაც საქართველომ გასული წლის ანალოგიურ პერიოდთან შედარებით $50 მლნ-ით ნაკლები შემოსავალი მიიღო. 

2. თხილის მოვლის ხარჯი ჰექტარზე 2500 ლარამდე გაიზარდა

პესტიციდებისა და შხამ–ქიმიკატების გაძვირებამ საქართველოში თხილის მოყვანის ხარჯი საგრძნობლად გაზარდა. ,,თხილის მწარმოებელთა ასოციაციის“ ინფორმაციით, 1 ჰექტარი თხილის მოვლა-წამლობა 2500 ლარი ჯდება, წინა სეზონზე ეს მაჩვენებელი დაახლოებით 2000 ლარის ფარგლებში იყო. ამ ხარჯის წილი 1 კგ თხილის თვითღირებულებაში, 2 ლარს შეადგენს.

3.შოიგუ: „მარიუპოლი ავიღეთ“

რუსეთის თავდაცვის მინისტრმა სერგეი შოიგუმ რუსეთის ლიდერ ვლადიმირ პუტინს მოახსენა, რომ „მარიუპოლი გათავისუფლებულია“.

შოიგუს თქმით, ამის მიუხედავად, „აზოვსტალის“ სამრეწველო ზონაში დაახლოებით 2 000 უკრაინელი სამხედროა ბლოკირებული. „ქალაქის ალყაში მოქცევის პერიოდისთვის მარიუპოლში უკრაინელი ჯარისკაცების რაოდენობა 8 000–ს აღწევდა“, – განაცხადა შოიგუმ.

4.ხილისა და ბოსტნეულის ექსპორტიორთა ახალშექმნილი ასოციაცია რუსეთის ალტერნატიულ ბაზრებს სწავლობს

ხილ-ბოსტნეულის ექსპორტის ხელშეწყობისა და ბაზრების დივერსიფიცირების მიზნით, საქართველოს ხილისა და ბოსტნეულის ექსპორტიორთა ასოციაცია დაფუძნდა.

5. Pampers-ისა და Ariel–ის მწარმოებელმა რუსეთში შესაძლოა ბიზნესი დახუროს

ჰიგიენის პროდუქციისა და საყოფაცხოვრებო ქიმიის მწარმოებელმა მსხვილმა ამერიკულმა კომპანიამ Procter&Gamble სანქციების გამო რუსეთის ბაზრიდან შესაძლო გასვლის შესახებ გაავრცელა ინფორმაცია. სააგენტო Reuters წერს, რომ ამის მიზეზებს შორის ფინანსური შეზღუდვები და მიწოდებასთან დაკავშირებული პრობლემები სახელდება.

6.„კომერსანტის“ ექსკლუზივი: საქართველო რუსეთიდან იმპორტირებულ ფქვილში რუბლს იხდის

რუსეთიდან ფქვილი იმპორტიორებს უკვე რუბლში შემოაქვთ. როგორც მათ ,,კომერსანტს“ განუცხადეს, უკრაინაში ომის დაწყებიდან 2 კვირაში, რუსეთის მიმართ სანქციების დაწესების პარალელურად, ფქვილის ექსპორტიორებმა ანგარიშსწორება რუბლში მოითხოვეს. ფქვილის იმპორტიორი, შპს ,,მარგის“ დირექტორი  ნუგზარ ღონიაშვილი ამბობს, რომ საქმიანობა უწევთ რთულ პირობებში, ვინაიდან შექმნილი სიტუაციით სარგებლობენ ბანკები და ითხოვენ მაღალ საკომისიოს, რომელიც ბოლო პერიოდის განმავლობაში 3%-დან 10%-მდე გაიზარდა.

7.„ლუკოილის“ ხელმძღვანელმა ვაგიტ ალეკპეროვმა თანამდებობა დატოვა

„ლუკოილის“ მთავარი აქციონერი ვაგიტ ალეკპეროვი კომპანიის დირექტორთა საბჭოდან გავიდა და ხელმძღვანელის თანამდებობაც დატოვა. ამის შესახებ ინფორმაციას რუსული საინფორმაციო სააგენტო რია ნოვოსტი ავრცელებს.

8.მარცვლეულის ბაზრის მოთამაშეები ფასების ზრდის ახალ ტალღას ელიან, ძვირდება პურიც

პურის ფასების შეჩერება უკვე წარმოუდგენელია. გლობალურ ბაზრებზე მარცვლეულის გაძვირების და ფასებთან დაკავშირებული ნეგატიური მოლოდინების პირობებში სულ უფრო აქტიურად მიმდინარეობს საუბარი ახალ საფასო ტენდენციაზე, რომელმაც გეზი თებერვლის ბოლოდან აიღო და სავარაუდოდ მომდევნო 3 წლის განმავლობაშიც გაგრძელდება.

9. რუსთავის მერიამ 650 ათასი ლარის დასუფთავების მოსაკრებლის ამოღება ვერ შეძლო

აუდიტის სამსახურმა რუსთავის მერიის 2019-2020 წლების საქმიანობის შესწავლისას, შესყიდვებთან და აქტივების მართვასთან დაკავშირებით დარღვევები გამოავლინა, პრობლემები სხვადასხვა მოსაკრებლის ამოღების კუთხითაც გამოიკვეთა.

10. აზერბაიჯანის გავლით ექსპორტირებული რუსული ნავთობი ბათუმის პორტში გაიჭედა

ევროკავშირი რუსეთის წინააღმდეგ სანქციების მეექვსე პაკეტის მიღებას გეგმავს, რომელიც, როგორც მოსალოდნელია, რუსული ნავთობის ექსპორტსაც შეეხება. მიუხედავად იმისა, რომ ეს სანქციები ძალაში ჯერ არ შესულა, წამყვანი ტრეიდერები, სანქციებში მოხვედრის შიშით, უარს ამბობენ რუსული ნედლეულის გაყიდვაზე. ყაზახური კომპანიებიც კი არიდებენ თავს დღეს რუსულ ნავთობს.