რუსეთიდან ფქვილი იმპორტიორებს უკვე რუბლში შემოაქვთ. როგორც მათ ,,კომერსანტს“ განუცხადეს, უკრაინაში ომის დაწყებიდან 2 კვირაში, რუსეთის მიმართ სანქციების დაწესების პარალელურად, ფქვილის ექსპორტიორებმა ანგარიშსწორება რუბლში მოითხოვეს. ფქვილის იმპორტიორი, შპს ,,მარგის“ დირექტორი ნუგზარ ღონიაშვილი ამბობს, რომ საქმიანობა უწევთ რთულ პირობებში, ვინაიდან შექმნილი სიტუაციით სარგებლობენ ბანკები და ითხოვენ მაღალ საკომისიოს, რომელიც ბოლო პერიოდის განმავლობაში 3%-დან 10%-მდე გაიზარდა.
,,ბოლო 1 თვეა, ფქვილის იმპორტს რუბლში ვახორციელებთ. ასეთი რამ პირველად ხდება, გასაგები მიზეზის გამო დღეს რუბლის ოპერაციები დიდ დისკომფორტს უკავშირდება. მაქსიმალურად ვართ შეზღუდული, 10%-ს გვაჭრის ბანკი კონვერტაციისას, ინკასაციის საკომისიო აქამდე 3%-ს არ აღემატებოდა. არც ასეთი მაღალო საკომისიო ყოფილა ოდესმე. ყოველმხრივ რთულ სიტუაციაში გვიწევს საქმიანობა. დოლარზე ვაჭრობა არის მარტივი და კომფორტული, კონკურენცია ყველაფერს ალაგებს, რუბლი ამის საშუალებას არ იძლევა. წამგებიან მდგომარეობაში აღმოვჩნდით. ომიდან დაახლოებით 2 კვირის შემდეგ, როგორც კი სანქციები ფართომასშტაბიანი გახდა, რუსულმა მხარემ დაიწყო საუბარი რუბლში გადახდაზე, ახლა უკვე მასობრივად ამ ვალუტაში მიდის ვაჭრობა“, - ამბობს ,,კომერსანტთან“ ფქვილის იმპორტიორი.
აღსანიშნავია, რომ ფქვილის იმპორტი რუსეთიდან მარტში, წლიურად, 11-ჯერ, ანუ 1 037%-ით გაიზარდა, ხოლო თვიურ ჭრილში 46,5%-ით არის შემცირებული. კერძოდ, ფქვილის იმპორტმა მარტში - 2 507 230 აშშ დოლარი შეადგინა, მაშინ როცა 2021 წლის ანალოგიურ პერიოდში ეს მაჩვენებელი - 220 530 აშშ დოლარი, ხოლო 2022 წლის თებერვალში - 4 682 010 აშშ დოლარი იყო.
ამ ეტაპზე 1 ტომარა ფქვილის ღირებულება ადგილობრივ ბაზარზე 75 ლარია.
მარი ჩიტაია