პესტიციდებისა და შხამ–ქიმიკატების გაძვირებამ საქართველოში თხილის მოყვანის ხარჯი საგრძნობლად გაზარდა. ,,თხილის მწარმოებელთა ასოციაციის“ ინფორმაციით, 1 ჰექტარი თხილის მოვლა-წამლობა 2500 ლარი ჯდება, წინა სეზონზე ეს მაჩვენებელი დაახლოებით 2000 ლარის ფარგლებში იყო. ამ ხარჯის წილი 1 კგ თხილის თვითღირებულებაში, 2 ლარს შეადგენს.
როგორც ,,თხილის მწარმოებელთა ასოციაციის“ ხელმძღვანელი გიორგი თოდუა ,,კომერსანტთან“ ამბობს, წამლობის პროცესი უკვე დაწყებულია.
მიიღე ინფორმაცია უფრო სწრაფად „კომერსანტის“ Telegram-ზე.
,,პირველ 2-3 წამლობაში სოკოვან დაავადებასთან ბრძოლას ვითვალისწინებთ, თხილი უნდა შეიწამლოს გოგირდით, სპილენძით და სხვა პრეპარატებით. აუცილებელია სასუქის შეტანაც, რომელიც ყველაზე მეტად არის გაძვირებული როგორც გლობალურ ბაზრებზე, ასევე საქართველოშიც.
სეზონის განმავლობაში 6 წამლობა უნდა ჩატარდეს. 1 ჰექტარი თხილის მოვლა და წამლობა მოსახლეობას 2500 ლარამდე დაუჯდება. ამ თანხაში შედის როგორც პესტიციდები და შხამ-ქიმიკატები, ასევე დასაწყობება, გაშრობა და მუშა ხელის ხარჯი. ამ მხრივ გარკვეულ შეღავათს გაუწევს მცირე ფერმერებს 300 ლარიანი ფინანსური დახმარება, რომელიც მთავრობამ სასოფლო-სამეურნეო სამუშაოებისთვის გამოყო. მესმის, რომ ამინდზეც ბევრი რამ არის დამოკიდებული, თუმცა კარგი მოსავალი თუ გვინდა, მოვლაც შესაბამისი უნდა“, - ამბობს გიორგი თოდუა.
მისი თქმით, ამ ეტაპზე 1 კგ. თხილის ფასი რეგიონებში 2 ლარამდე შემცირდა, რაც პროდუქტის დაბალი ხარისხით არის განპირობებული.
ხარისხიანი პროდუქტის ფასი 8-9 ლარს აღწევს, მაგრამ ასეთი თხილი ბაზარზე რეალურად არ არის შემორჩენილი, რის გამოც ხალხს იაფად უწევს გაყიდვა.
როგორც გიორგი თოდუა ამბობს, თხილის წარმოებაში ერთ-ერთი სერიოზული პრობლემა მოსავლის შრობა-შენახვას უკავშირდება, თუმცა რეგიონებში რამდენიმე შემნახველი მეურნეობა გაიხსნა და კიდევ შენდება, რაც საბოლოოდ თხილის ხარისხზეც აისახება.
არსებული მონაცემებით, 2021 წელთან შედარებით, წელს შხამ-ქიმიკატების ფასი 40-50%-ით, ზოგ შემთხვევაში 100%-ითაც კი არის გაზრდილი.
შხამ-ქიმიკატების იმპორტი ძირითადად თურქეთიდან, უკრაინიდან, რუსეთიდან და ევროპის რამდენიმე ქვეყნიდან ხორციელდება, ფასები კი ყველა ბაზარზე გაზრდილია.
რაც შეეხება ტექნიკურ მხარეს, ცნობისთვის, გადამმუშავებელი და შემნახველი საწარმოების თანადაფინანსების პროექტის ფარგლებში, 2021 წელს, საქართველოს სხვადასხვა რეგიონში შეიქმნა 51 შემნახველი მეურნეობა, რომლის ჯამური საინვესტიციო ღირებულება 70 მლნ ლარამდეა, ამ პროექტების სახელმწიფო თანადაფინანსება 24 მლნ ლარამდეა.
სახელმწიფო გრანტის მიღების პარალელურად, ბენეფიციარებს აქვთ შესაძლებლობა ისარგებლონ შეღავათიანი აგროკრედიტითაც.
2021 წლის განმავლობაში შექმნილი გადამმუშავებელი და შემნახველი მეურნეობების საინვესტიციო ღირებულება, ჯამში, 87 მლნ ლარს აჭარბებს.
მარი ჩიტაია