ხილ-ბოსტნეულის ექსპორტის ხელშეწყობისა და ბაზრების დივერსიფიცირების მიზნით, საქართველოს ხილისა და ბოსტნეულის ექსპორტიორთა ასოციაცია დაფუძნდა. ახალშექმნილი ორგანიზაცია ბაზრების დივერსიფიცირების გარდა, აქტიურად იმუშავებს ქვეყნის გარეთ ქართული პროდუქციის ცნობადობის ამაღლების, ხარისხის სტანდარტის გაუმჯობესებისა და საგანმანათლებლო მიმართულებით, რაც დღეს სექტორში გამოწვევად მიიჩნევა.

მიიღე ინფორმაცია უფრო სწრაფად „კომერსანტის“  Telegram-ზე.

ბიზნესგაერთიანების თანადამფუძნებელი და კომპანია „ფრუტილიას“ ხელმძღვანელი ვახტანგ ბეჟიტაშვილი ამბობს, რომ ასოციაციაში საწყის ეტაპზე 20- მდე კომპანია გაერთიანებული და მათი რაოდენობა სამომავლოდ კიდევ გაიზრდება.

 „ასოციაციის ძირითადი მიზანი საქართველოდან ხილის ექსპორტის ხელშეწყობა და თანამედროვე გამოწვევების საპასუხოდ ბაზრების დივერსიფიკაციასთან დაკავშირებით ერთობლივი მუშაობაა. ამ ეტაპზე არსებული სხვადასხვა ფაქტორის გათვალისწინებით, ასოციაციის შექმნა გადავწყვიტეთ, რათა ადგილობრივმა კომპანიებმა ერთობლივი მუშაობის შედეგად, არსებული გამოწვევების გაანალიზება, დამუშავება და გადაჭრა შევძლოთ. დღეისთვის ხილის და ბოსტნეულის ექსპორტიორებისთვის მთავარი საკითხი ბაზრების დივერსიფიკაციაა“, – აღნიშნა ვახტანგ ბეჟიტაშვილმა.

,,ასოციაციაში გაერთიანებულ ოცივე კომპანიას ამ სფეროში დიდი გამოცდილება აქვს. ვცდილობთ წარმატებით გადავჭრათ ის საკითხები, რაც ამ ეტაპზე წარმოებისა და ექსპორტის მიმართულებით არსებობს. პრიორიტეტი იქნება ბაზრების დივერსიფიკაცია, ასოციაციის მეშვეობით ვგეგმავთ ასევე სხვადასხვა საგანმანათლებლო ღონისძიებებს, ჩატარდება ტრენინგები და აქტიურად ვიმუშავებთ ექსპორტის ზრდისა და მაღალი სტანდარტის ქართული პროდუქტის სავაჭრო ნიშის შექმნისთვის. ეს შეეხება როგორც ხარისხს, ასევე ფასებს. სახელმწიფო პროექტები, როგორიცაა  ,,დანერგე მომავალი“, ,,იაფი სესხი“ და სხვა წარმოების ზრდის მიმართულებით მნიშვნელოვანია. მოსავლიანობა იზრდება და შესაბამისად ექსპორტიც მატულობს“, - ამბობს ,,კომერსანტთან“ ვახტანგ ბეჟიტაშვილი.

მისი თქმით, ამ ეტაპზე ქართული ხილისა და ბოსტნეულის ექსპორტი რუსეთში შეუზღუდავად ხორციელდება, თუმცა გამოწვევად რჩება ევროპული ბაზრები, რასაც ადგილობრივი პროდუქტი დიდწილად  კონკურენტუუნაროდ მიიჩნევა დაბალი ხარისხის გამო.

,,რუსულ ბაზარზე ჩვეულებრივ მიდის მუშაობა, თუ არ ჩავთვლით ტრანსპორტირებასთან დაკავშირებით პრობლემას, უგზოობა გვიშლის ხელს, სხვა დაბრკოლება არ გვაქვს და ჩვეულ რეჟიმში ვაგრძელებთ გადაზიდვებს. რაც შეეხება ალტერნატიულ ბაზრებს, კონკრეტულ გეგმამდე რომ მივალთ, უფრო დაზუსტებით შეგვეძლება ლაპარაკი პოტენციურ ბაზრებზეც. ვფიქრობთ, ეს შეიძლება იყოს ბალტიისპირეთის ქვეყნები, პოლონეთი, საბერძნეთი, ბულგარეთი, რუმინეთი, ასევე გერმანია და საფრანგეთი. ამისთვის საჭიროა მუშაობა, გლობალურ გამოფენებში მონაწილეობა და ხარისხის აწევა. თუკი არ გვექნება შესაბამისი შეფუთვა, სერტიფიცირებული პროდუქტი და მაღალი სტანდარტი, ევროპის ბაზრებზე ვერ შევალთ. ამდენად ასოციაცია ემსახურება გამოწვევებს, განაცხადი გაკეთებულია, სავარაუდოდ საქართველო მალე გახდება ევროკავშირის წევრი და ჩვენ, გარდა წევრობისა, შესაბამისი სტანდარტებითაც უნდა შევიდეთ ევროკავშირში. სხვანაირად არ გამოვა, ამ წევრობიდან რაც შეიძლება მეტი სარგებელი უნდა მივიღოთ“, - აცხადებს ვახტანგ ბეჟიტაშვილი ,,კომერსანტთან“.

შეგახსენებთ, რომ მარტში საქართველოდან რუსეთში მხოლოდ 0,8 მლნ დოლარის ხილი, თხილი და ბოსტნეული გავიდა, რაც, 2014 წლის ემბარგოს მოხსნის შემდეგ, ანალოგიური თვის ყველაზე დაბალი მაჩვენებელია. პორტალი EastFruit მომავალში ექსპორტის კიდევ უფრო დაცემას ვარაუდობს, რასაც უკრაინის ომსა და რუსეთის წინააღმდეგ დაწესებულ სანქციებს უკავშირებს.

წლიური გაანგარიშებით, რუსეთში ექსპორტი მებაღეობის ყველა ძირითად პროდუქტზე შემცირდა. 2021 წლის მარტთან შედარებით, რუსებმა, დაახლოებით 0,9 მლნ დოლარით ნაკლები ვაშლი, მილიონი დოლარით ნაკლები თხილი და 0,2 მლნ დოლარით ნაკლები კარტოფილი იყიდეს. 4%-ით შემცირდა მწვანილის ექსპორტიც, მაშინ, როცა ამ პროდუქტის ექსპორტის პიკური თვე სწორედ მარტია. ზოგადად, მწვანილი ქართული ხილ-ბოსტნეულის ექსპორტში, განსაკუთრებით რუსეთის მიმართულებით, საკვანძო პროდუქტია.

მარი ჩიტაია