სანქტ-პეტერბურგის სახელმწიფო უნივერსიტეტის ტექნოლოგიურ ცენტრში ბანკთაშორისი შეტყობინებების სისტემის ინტერფეისი წარადგინეს, რომლითაც რუსეთი SWIFT-ის ჩანაცვლებას გეგმავს. ამის შესახებ ინფორმაციას რუსული მედია ავრცელებს.
შემქმნელების განცხადებით, სისტემა უკვე მზად არის გამოსაყენებლად და ათეულ ორგანიზაციაში ტესტირების პროცესშია.
როგორც ცენტრის დირექტორმა დიმიტრი შიშმაკოვმა აღნიშნა, ახალი სისტემა ფინანსური მესიჯების გადაცემის სრულფასოვანი და მოქნილი ინსტრუმენტია. მისივე თქმით, ბანკთაშორისი შეტყობინებების დეცენტრალიზებული სისტემა ბლოკჩეინ ტექნოლოგიაზეა დაფუძნებული და არ ჰყავს ერთი ოპერატორი, რომელსაც მონაწილეების გათიშვა ან მონაცემების რაიმე ფორმით შეცვლა შეუძლია.
„ანუ, სისტემას უბრალოდ არ აქვს ერთი ცენტრი და „საკონტროლო პანელი“, ყველა მომხმარებელს აქვს წვდომა საჭირო ინფორმაციაზე და შეუძლია საბანკო შეტყობინებების გაცვლა იმ შეზღუდვების გარეშე, რაც აქვს SWIFT-ს“, - განმარტა შიშმაკოვმა.
ავტორების განცხადებით, პროექტის განხორციელება პეტერბურგის უნივერსიტეტში გასული წლის აპრილში დაიწყო და მისი პროტოტიპი ივლისის ბოლოს უკვე მზად იყო. 1 წლის განმავლობაში პროექტი 10-ზე მეტმა ორგანიზაციამ გამოცადა.
სისტემის კომპონენტები ამჟამად ტრანსსასაზღვრო დასახლებებზე საინფორმაციო და ანალიტიკური ურთიერთქმედების პლატფორმაში გამოიყენება, რომელიც რუსეთის მრეწველებისა და მეწარმეთა კავშირის მიერაა შექმნილი.
