ხორვატიაში დაიწყო კამპანია „სუპერმამა“ (SuperTata), რომლის მიზანია, მამაკაცები უფრო აქტიურად ჩაერთონ როგორც ბავშვების აღზრდაში, ისე საოჯახო საქმეებში. ორგანიზატორების აზრით, კარგი მამობა მხოლოდ სამსახურის შემდეგ ბავშვთან თამაშს არ ნიშნავს. ის ასევე მოიცავს სადილის მომზადებას, ბავშვის დაბანას, სახლის დალაგებასა და ყოველდღიური პასუხისმგებლობების გაზიარებას.
კამპანიას ხორვატიული საზოგადოებრივი ორგანიზაცია Status M საერთაშორისო ინიციატივა MenCare-ის ფარგლებში ახორციელებს. MenCare დღეს მსოფლიოს 50-ზე მეტ ქვეყანაში მუშაობს. ხორვატიაში პროექტს ოჯახური ცენტრები, სოციალური სამსახურები და სამედიცინო დაწესებულებებიც შეუერთდნენ. შეხვედრებზე მომავალი და ახალგაზრდა მამები სპეციალისტებთან ერთად განიხილავენ ბავშვზე ზრუნვას, საოჯახო ვალდებულებების განაწილებასა და ოჯახურ ურთიერთობებს. მთავარი იდეაა, რომ მამა ოჯახში „დამხმარე“ კი არა, თანაბარი პასუხისმგებლობის მქონე პარტნიორი იყოს.
პროგრამის შექმნის მიზეზი ხორვატიულ ოჯახებში საოჯახო შრომის არათანაბარი განაწილებაა. კვლევების მიხედვით, სამუშაო დღეებში ქალები საოჯახო საქმეებზე საშუალოდ დაახლოებით ოთხ საათს ხარჯავენ, კაცები კი ერთ საათზე ნაკლებს. ამასთან, ბევრი მამაკაცი საკუთარ მონაწილეობას ჯერ კიდევ პარტნიორის დახმარებად აღიქვამს და არა საერთო სახლისა და ოჯახის მიმართ თანაბარ პასუხისმგებლობად.
ორგანიზატორების თქმით, ყოველდღიური საქმეების უფრო თანაბრად განაწილება მშობლების ემოციური გადაღლის შემცირებას, პარტნიორებს შორის ურთიერთობების გაძლიერებას და მამების შვილებთან უფრო მეტ ყოველდღიურ ურთიერთობას უწყობს ხელს.
პროგრამა ასევე გრძელვადიან ეფექტზე ამახვილებს ყურადღებას. კვლევები აჩვენებს, რომ ბავშვები მომავალ ოჯახურ ცხოვრებაში ხშირად იმ მოდელს იმეორებენ, რომელიც საკუთარ ოჯახში ნახეს. თუ მამა აქტიურად არის ჩართული ბავშვების მოვლასა და საოჯახო საქმეებში, მისი შვილებიც უფრო მეტად აღიქვამენ პასუხისმგებლობების თანაბარ განაწილებას ბუნებრივ ოჯახურ მოდელად.
MenCare-ის მონაცემებით, ოჯახებში, სადაც მამები უფრო აქტიურად მონაწილეობენ ბავშვების აღზრდასა და ყოველდღიურ საოჯახო ცხოვრებაში, პარტნიორებს შორის ურთიერთობები უფრო ნდობაზეა დაფუძნებული და ოჯახში ძალადობის რისკიც მცირდება. სწორედ ამიტომ მსგავსი პროგრამები სულ უფრო მეტი ქვეყნის საოჯახო პოლიტიკის ნაწილი ხდება.
