ხელოვნურ ინტელექტთან საუბრის მანერა შეიძლება მიღებული პასუხის ხარისხსა და მოცულობაზე აისახოს. ავსტრიელმა მკვლევრებმა დაადგინეს, რომ მომხმარებლები, რომლებიც AI-ს თავაზიანად მიმართავენ და მას რეალურ თანამოსაუბრესავით ესაუბრებიან, უფრო ვრცელ და ინფორმაციულ პასუხებს იღებენ.
ინსბრუკის უნივერსიტეტის მეცნიერებმა მასშტაბური ექსპერიმენტის ფარგლებში სამი ენობრივი მოდელის მონაწილეობით 18 ათასი დიალოგი მოახდინეს სიმულაციით. მკვლევრებმა კომუნიკაციის ხუთი განსხვავებული სტილი გამოიყენეს, მათ შორის უხეში და ძალიან მოკლე მიმართვებიც.
კვლევამ აჩვენა, რომ როცა მომხმარებელი კითხვას თავაზიანად აყალიბებდა, მადლობას იხდიდა და ზოგჯერ ბოდიშსაც კი იხდიდა, თუ მანამდე ასისტენტი შეცდომაში უსამართლოდ დაადანაშაულა, მიღებული პასუხები უფრო სასარგებლო და დეტალური იყო.
მეცნიერების მონაცემებით, თავაზიანი კომუნიკაციის შემთხვევაში AI-ის პასუხები თითქმის ორჯერ უფრო გრძელი და დეტალური იყო, ვიდრე ძალიან მოკლე მოთხოვნების დროს. ამავე დროს, ასეთ პასუხებში დაახლოებით 1.5-ჯერ მეტი სასარგებლო ინფორმაცია იყო.
უხეში მიმართვა, პირიქით, AI-ასისტენტებთან კომუნიკაციის ეფექტიანობას ამცირებდა. ასეთი მოთხოვნების შემთხვევაში მოდელებს პასუხის მოსაძებნად ზოგჯერ მეტი დრო სჭირდებოდათ, საბოლოო პასუხები კი, როგორც წესი, უფრო მოკლე და ნაკლებად ინფორმაციული იყო. მკვლევრების თანახმად, მიღებული ინფორმაცია დამატებით გადამოწმებასაც უფრო ხშირად საჭიროებდა.
კვლევამ კიდევ ერთი საინტერესო ფაქტორიც გამოავლინა: თავაზიანობას ენერგეტიკული „ფასი“ აქვს. უფრო გრძელი პასუხების გენერირება დამატებით გამოთვლით რესურსს და შესაბამისად მეტ ელექტროენერგიას მოითხოვს. ამიტომ ადამიანის მსგავსი, თავაზიანი კომუნიკაცია AI-სგან უკეთეს პასუხებს იწვევს, თუმცა სისტემისთვის დამატებით რესურსებთანაც არის დაკავშირებული.
წყარო: https://euro-pulse.ru/news/ii-daet-bolshe-informaczii-vezhlivym-polzovatelyam-issledovanie/
