ამერიკული საინვესტიციო გიგანტი Charles Schwab აცხადებს, რომ უახლოეს კვირებში მომხმარებლებისთვის ეტაპობრივად ჩაუშვებს ახალ სერვისს — Schwab Crypto, რომლის საშუალებითაც კლიენტები პლატფორმიდან პირდაპირ შეძლებენ კრიპტოაქტივებით ვაჭრობას. პირველ ეტაპზე ხელმისაწვდომი იქნება ორი ყველაზე მსხვილი ციფრული აქტივი — Bitcoin და Ethereum.

კომპანიის ინფორმაციით, მომხმარებლებს კრიპტოვალუტებით ვაჭრობა შეეძლებათ იმავე ეკოსისტემაში, სადაც უკვე მართავენ აქციებს, ობლიგაციებსა და სხვა ინვესტიციებს. მომსახურება ინტეგრირებული იქნება Schwab-ის ვებპლატფორმაზე, მობილურ აპლიკაციასა და thinkorswim სავაჭრო სისტემაში.

Charles Schwab ხაზს უსვამს, რომ ახალი პროდუქტი გათვლილია იმ მომხმარებლებზე, ვისაც სურს ციფრული აქტივები შეიძინოს სანდო და ცნობილ ფინანსურ ბრენდთან, დამატებითი საგანმანათლებლო მასალებისა და პროფესიონალური მხარდაჭერის პირობებში. კომპანიის შიდა კვლევის მიხედვით, კრიპტოინვესტორებისთვის მთავარი ფაქტორებია დაბალი საკომისიო, უსაფრთხოება და ბრენდის სანდოობა.

ახალი სერვისის ფარგლებში თითოეულ გარიგებაზე დაწესდება 0.75%-იანი საკომისიო, ხოლო მომავალში კომპანია გეგმავს სხვა კრიპტოაქტივების დამატებას, ასევე დეპოზიტისა და გატანის ფუნქციების გაფართოებას.

ეს ნაბიჯი კიდევ ერთხელ აჩვენებს, რომ ტრადიციული ამერიკული ფინანსური სექტორი აქტიურად შედის კრიპტობაზარზე. ბოლო წლებში მსგავსი მიმართულებით გააქტიურდნენ Fidelity, Morgan Stanley და სხვა მსხვილი მოთამაშეებიც, რაც ნიშნავს, რომ ციფრული აქტივები უკვე მხოლოდ ალტერნატიული ბაზარი აღარ არის და ნელ-ნელა კლასიკურ ფინანსურ სისტემაშიც მკვიდრდება.

წყაროები: