საერთაშორისო სავალუტო ფონდის (სსფ) ახალი ანგარიშის თანახმად, მოსალოდნელია, რომ 2028 წლისთვის პოლონეთი შვეიცარიას გაუსწრებს და ეკონომიკის სიდიდით, მსოფლიოში რიგით მე-20 ქვეყანა გახდება.
საერთაშორისო სავალუტო ფონდის ბოლო „მსოფლიო ეკონომიკური მიმოხილვის“ მიხედვით, ნომინალური მთლიანი შიდა პროდუქტის (მშპ) მიხედვით, პოლონეთი მსოფლიოში 21-ე ადგილზეა. 2025 წელს მისი მშპ 1.04 ტრილიონ აშშ დოლარად შეფასდა, რაც ოდნავ ჩამორჩება შვეიცარიის ანალოგიურ მაჩვენებელს.
რეიტინგი, სავარაუდოდ, 2026 წელსაც უცვლელი დარჩება: პროგნოზების თანახმად, მიმდინარე წელს შვეიცარიის მშპ 1.15 ტრილიონი დოლარი იქნება, ხოლო პოლონეთის - 1.13 ტრილიონი დოლარი.
თუმცა, ექვსი თვით ადრე, 2025 წლის ოქტომბრის ანგარიშში, სსფ მიიჩნევდა, რომ პოლონეთი შვეიცარიას უკვე 2026 წელს გაუსწრებდა. როგორც პოლონეთის სახელმწიფო საინფორმაციო სააგენტო PAP-ი იუწყება, პროგნოზის გადახედვა შვეიცარიის ხელისუფლების მიერ სტატისტიკური მონაცემების განახლებას უკავშირდება.
სსფ-ს ბოლო პროგნოზით, პოლონეთის ეკონომიკა შვეიცარიისას 2028 წელს გადააჭარბებს, როდესაც მისი ნომინალური მშპ დაახლოებით 1.25 ტრილიონ დოლარს მიაღწევს.
რეიტინგში მე-19 ადგილი ამჟამად საუდის არაბეთს უკავია (დაახლოებით 1.28 ტრილიონი დოლარი), ხოლო პოლონეთის შემდეგ მოდის ტაივანი - დაახლოებით 920 მილიარდი დოლარი.
სსფ-ის მონაცემებით, მსყიდველობითი უნარის პარიტეტის (PPP) მიხედვითაც, პოლონეთი ასევე 21-ე ადგილზეა მსოფლიოში. ის ჩამორჩება ტაივანს და უსწრებს ავსტრალიას.
პოლონეთის ფინანსთა მინისტრის, ანჯეი დომანსკის განცხადებით, შვეიცარიის მონაცემების გადახედვა გავლენას არ ახდენს პოლონეთის ამბიციაზე, „დიდ ოცეულს“ (G20) შეუერთდეს. მან აღნიშნა, რომ G20-ში ყოფნის მკაცრი კრიტერიუმები არ არსებობს და მასში შედიან არა მხოლოდ მსოფლიოში 20 უდიდესი ეკონომიკის მქონე სახელმწიფოები, არამედ საკვანძო რეგიონული მოთამაშეებიც.
მაგალითად, „დიდი ოცეულის“ ამჟამინდელ წევრებს შორის არიან არგენტინა და სამხრეთ აფრიკა, რომლებსაც, გლობალური მშპ-ის თვალსაზრისით, უფრო დაბალი რეიტინგი აქვთ.
პოლონეთი წელს მონაწილეობას იღებს G20-ის შეხვედრებში, მათ შორის ფინანსთა მინისტრების შეკრებაზე ვაშინგტონში, რომელიც ხუთშაბათს იმართება და ლიდერთა სამიტზე, რომელიც დეკემბერში ტარდება. ამ ფორუმებზე ის, ფაქტობრივად, სამხრეთ აფრიკას ანაცვლებს, თუმცა ეს უკანასკნელი G20-ის ფორმალურ წევრად მაინც რჩება.
ეს ცვლილება მოჰყვა აშშ-ის გადაწყვეტილებას, არ მიეწვია სამხრეთ აფრიკა „დიდი ოცეულის“ შეკრებაზე, თეთრკანიანი ფერმერების მიმართ მოპყრობასთან დაკავშირებული დავის გამო.
G20-ს წელს აშშ თავმჯდომარეობს, რომლის სახელმწიფო მდივანმა, მარკო რუბიომ გასული წლის დეკემბერში განაცხადა: „პოლონეთი არის ერი, რომელიც ოდესღაც რკინის ფარდის მიღმა იყო მომწყვდეული, ახლა კი მსოფლიოს 20 უდიდეს ეკონომიკას შორისაა. ის შემოგვიერთდება, რათა G20-ში კუთვნილი ადგილი დაიკავოს“.
მან ასევე აღნიშნა: „პოლონეთის წარმატება იმის დასტურია, რომ მომავალზე ფოკუსირება უკეთესი გზაა, ვიდრე წყენებზე კონცენტრირება. ეს აჩვენებს, თუ როგორ შეუძლია შეერთებულ შტატებთან და ამერიკულ კომპანიებთან პარტნიორობას ორმხრივი კეთილდღეობისა და განვითარებისთვის ხელშეწყობა“.
