ევროკავშირის ქვეყნების უმაღლეს სასწავლებლებში 2023 წელს 1.76 მილიონი უცხოელი სტუდენტი სწავლობდა, რაც სტუდენტის 8.4%-ს შეადგენს, - ამის შესახებ ირკვევა „ევროსტატის“ განახლებული ანგარიშიდან.
ამავე მონაცემების მიხედვით, უმაღლესი განათლების სხვადასხვა საფეხურზე ჩარიცხული უცხოელი სტუდენტების წილი ყველაზე მაღალი იყო ლუქსემბურგში (52.3%), მას კი მოსდევდა მალტა (29.6%) და კვიპროსი (22.3%).
აღსანიშნავია ისიც, რომ უცხოელი სტუდენტების წილი ყველაზე დაბალი იყო საბერძნეთში (3%), ხორვატიასა (3.7%) და ესპანეთში (4.3%).
რაც შეეხება საქართველოს, „ევროსტატის“ მონაცემებით, უმაღლეს სასწავლებლებში ბაკალავრის, მაგისტრატურისა და დოქტორანტურის საფეხურზე ევროკავშირში სულ სწავლობდა 4 179 საქართველოს მოქალაქე, აქედან საბაკალავრო პროგრამებზე - 2 114, მაგისტრატურის საფეხურზე - 1 727, ხოლო დოქტორანტურაზე - 338 სტუდენტი.
აღსანიშნავია, რომ სწავლების სამივე საფეხურის შემთხვევაში ევროკავშირის ქვეყნებს შორის საქართველოს მოქალაქეებისთვის ლიდერი იყო გერმანია. უმაღლესი განათლების სამივე საფეხურზე გერმანიაში ჯამში საანგარიშო პერიოდში 1 936 ქართველი სტუდენტი სწავლობდა.
კერძოდ, სამივე საფეხურის შემთხვევაში, იმ ქვეყნების ხუთეული, სადაც ყველაზე მეტი ქართველი სწავლობდა, ასე გამოიყურებოდა:
საბაკალავრო საფეხური:
- გერმანია - 870 სტუდენტი;
- საბერძნეთი - 166 სტუდენტი;
- საფრანგეთი - 150 სტუდენტი;
- ნიდერლანდები - 111 სტუდენტი;
- უნგრეთი - 102 სტუდენტი.
სამაგისტრო საფეხური:
- გერმანია - 845 ჩარიცხული;
- იტალია - 138 ჩარიცხული;
- საფრანგეთი - 122 ჩარიცხული;
- ავსტრია - 106 ჩარიცხული;
- ჩეხეთი - 82 ჩარიცხული.
დოქტორანტურის საფეხური:
- გერმანია - 221 სტუდენტი;
- ჩეხეთი - 22 სტუდენტი;
- საფრანგეთი - 20 სტუდენტი;
- შვეიცარია - 20 სტუდენტი;
- უნგრეთი - 14 სტუდენტი.
