"ხელისუფლება არალეგიტიმურია, რაც ქვეყნისთვის იმდენად მძიმე პერსპექტივაა, რომ თუ ამ ქვეყანაში ცხოვრებას აპირებთ, იხდით გადასახადებს, გაქვთ ბიზნესი, გაქვთ გეგმები და ა.შ. ყველაფერი უნდა გააკეთოთ ამ მოცემულობის შესაცვლელად" - ასე ეხმაურება ქვეყანაში მიმდინარე პოლიტიკურ პროცესებს „ექსპო ჯორჯიას“ დირექტორი, რესან ქიქავა.
პოსტში ის მარტივად და ყველასთვის გასაგებად განმარტავს იმ ეკონომიკურ რისკებს, რაც ხელისუფლების ამჟამინდელ საგარეო კურსს და ანტიდასავლურ პოლიტიკას ახლავს.
"კომერსანტი" მის პოსტს უცვლელად გთავაზობთ:
"დღეს ქვეყანას არ მართავენ ამ ქვეყნის მოსახლეობის უმრავლესობის წარმომადგენლები.
4%-ით მეტი ხმის მიღება (თუნდაც) ასეთი ხარისხის არჩევნებში, არის რეალური მარცხი. ეს იცის ყველამ და ამიტომ არის, რომ ამ არჩევნებს არავინ აღიარებს.
შესაბამისად, არსებული საკანონმდებლო და აღმასრულებელი ხელისუფლება არალეგიტიმურია.
ვინც ვერ ხვდება ეს რას ნიშნავს და არ იცნობს ვთქვათ ბელარუსის, ან მიანმარის მაგალითებს, მარტივად განვმარტავ (სამოქალაქო დონეზე, რადგან ამ დარგის ექსპერტი არ გახლავართ):
- ეკონომიკური სანქციები (სავაჭრო, საინვესტიციო, გლობალურ ფინანსურ სისტემებზე წვდომა და ა.შ)
-უსაფრთხოების რისკები (რუსეთს რომ თავი დავანებოთ, ნებისმიერი სხვა ქვეყნის მხრიდან, რაიმე სახის აგრესიის პირობებში, მათთან პირისპირ დარჩენა და ა.შ.)
დამატებით, როდესაც ყველა ინსტიტუტი და შესაბამისად ძალაუფლება ერთი ადამიანის ხელშია (რაც სხვა არაფერია, თუ არა დიქტატურა), სამოქალაქო და ბიზნეს დონეზე ასეთი ტიპის საერთაშორისო იზოლაცია ნიშნავს დიქტატორთან პირისპირ დარჩენას და მის კეთილ, თუ ბოროტ ნებაზე 100%-იან დამოკიდებულებას.
დღეს ამ არალეგიტიმური ხელისუფლების მიერ ხდება კონსტიტუციის მიტაცება. ხვალ, აუცილებლად მოხდება უარესი.
თუ ამ ქვეყანაში ცხოვრებას აპირებთ, იხდით გადასახადებს, გაქვთ ბიზნესი, გაქვთ გეგმები და ა.შ. ყველაფერი უნდა გააკეთოთ ამ მოცემულობის შესაცვლელად.
ამისთვის, ამ პირობებში, თუ არსებობს ქუჩაში პროტესტის გარდა რამე სხვა ფორმა, შემომთავაზეთ, სიამოვნებით გავითვალისწინებ. მეც მინდა ვაკეთო ჩემი საქმე, მეც არ მომწონს ოპოზიცია და სულ არ მეხალისება ღამის ქუჩაში თენება.მაგრამ დღეს, რუსთაველის გარდა, სამართლიანობის მოთხოვნის სხვა დემოკრატიული ინსტიტუტი არ დაგვიტოვეს.
ვიცი, რომ დღეს თუ გავჩერდი, ხვალ ესეც აღარ მექნება", - წერს რესან ქიქავა სოციალურ ქსელში.
შეგახსენებთ, მესამე დღეა, საქართველოს პარლამენტთან ევროინტეგრაციის მხარდამჭერი აქცია მიმდინარეობს. დემონსტრანტები აპროტესტებს მთავრობის გადაწყვეტილებას, 2028 წლის ბოლომდე მოხსნან დღის წესრიგიდან საქართველოს ევროკავშირში გაწევრებაზე მოლაპარაკებების დაწყება.
შინაგან საქმეთა სამინისტროს ცნობით, 29-30 ნოემბრის საპროტესტო აქციის დროს, სამართალდამცველთა მიერ პოლიციელის კანონიერი მოთხოვნისადმი დაუმორჩილებლობისა და წვრილმანი ხულიგნობისთვის 107 პირია დაკავებული. ანუ უწყებამ ერთ ღამეში 107 ადამიანი დააკავა. მათივე ინფორმაციით, დაშავებულია შინაგან საქმეთა სამინისტროს 10 თანამშრომელი. ჯანდაცვის სამინისტროს ინფორმაციით, 29 ნოემბრის აქციიდან სამედიცინო დაწესებულებებში 40 პირი გადაიყვანეს.
რამდენიმე ადამიანი დააკავეს აქციის მესამე დღესაც. სპეცრაზმმა აქციის მონაწილეების წინააღმდეგ რამდენჯერმე გამოიყენა წყლის ჭავლი და ე.წ. გაზის კაფსულები. მოქალაქეები პიროტექნიკის გამოყენებით ცდილობდნენ, თავი დაეცვათ ძალოვნების შემოტევისგან. ამ დრომდე ჭავჭავაძის გამზირზე აქციის მონაწილეებს გადაკეტილი აქვთ გზები და ამტკიცებენ, რომ უწყვეტი პროტესტი გაგრძელდება.
მიმდინარე პროცესებისგან დისტანცირებისა და პროტესტის ნიშნად სამსახურები დატოვეს: ეროვნული ბანკის ასეულობით თანამშრომელმა, თბილისის მერიის თანამშრომლების ნაწილმა, იუსტიციის სახლის ათეულობით და საგარეო საქმეთა სამინისტროს ასეულობით თანამშრომელმა, საჯარო რეესტრის ასეულობით თანამშრომელმა, პროსახელისუფლებო მედიის რამდენიმე ჟურნალისტმა. "ქართული ოცნების" ანტიდასავლურ პოლიტიკას გაემიჯნა სემეკისა და პარლამენტის თანამშრომლების ნაწილი. პოსტები დატოვეს და "ქართული ოცნების" ანტიევროპულ პოლიტიკას გაემიჯნენ ქართველი დიპლომატები, ელჩები. საქართველოს ევროკავშირში გაწევრიანების პროცედურების შეწყვეტას გაემიჯნენ სოციალური მუშაკებიც. ძალადობა დაგმეს და ევროინტეგრაციის გზაზე მოქალაქეებს თანადგომა გამოუცხადეს მსხვილმა კომერციულმა ბანკებმაც.
საქართველოს ევროპული გზიდან გადახვევა და რუსეთის წიაღში დაბრუნება კატეგორიულად მიუღებელია ხელნაწერთა ეროვნული ცენტრის თანამშრომლებისთვისაც. იგივე პოზიცია აქვს ივანე ჯავახიშვილის სახელობის თბილისის სახელმწიფო უნივერსიტეტის აკადემიურ პერსონალსაც, რომლებიც საჯარო განცხადებით გაემიჯნენ "კონსტიტუციისა და ევროკავშირში ინტეგრაციის კურსის ღალატის ნებისმიერ მცდელობას". ამავე შინაარსის განცხადებებს ავრცელებენ და ევროკავშირთან მოლაპარაკების შეწყვეტას გმობენ სხვადასხვა საჯარო თუ კერძო ორგანიზაციები.
ძალადობა დაგმო და ქართველ ხალხს თანადგომა გამოუცხადა სპორტსმენების ნაწილმა. პროტესტის ნიშნად დაიხურა რამდენიმე რესტორანი. გაკვეთილის ჩატარებაზე უარი თქვა რამდენიმე პედაგოგმა.
ხელისუფლების გადაწყვეტილება დაგმო სხვადასხვა დარგობრივმა ბიზნესგაერთიანებებმა და ასოციაციებმა.
სპექტაკლები გააუქმეს ან გადადეს თეატრებმა.
პრეზიდენტ ზურაბიშვილის შეფასებით, მასობრივი პროტესტი ეროვნულ დაუმორჩილებლობაში იზრდება.
საქართველოსთან სტრატეგიული პარტნიორობა შეაჩერა აშშ-მა.
