„დღეს ძალიან მნიშვნელოვანი დღეა Gebrüder Weiss - ისთვის. ჩვენ 25 მილიონის ინვესტიცია განვახორციელეთ. თავიდან, საქართველოში საქმიანობის დაწყება არ იყო იოლი. თუმცა, ჩვენ ვენდეთ საქართველოს და მის მთავრობას და ამან გაამართლა. ჩვენი ბიზნესი წარმატებით ვითარდება და ბიზნეს-გარემო უბრალოდ შესანიშნავია. ამიტომ, გაფართოების შემდეგი ნაბიჯის შესახებ გადაწყვეტილება მარტივად მივიღეთ. ბიზნეს გარემო მნიშვნელოვანია არა მხოლოდ ჩვენი კომპანიისთვის, არამედ ზოგადად, საქართველოში სხვადასხვა ბიზნესის განვითარებისთვის,“ - განაცხადა კომპანიის Gebrüder Weiss - ის აღმასრულებელმა დირექტორმა ვოლფრამ ზენგერ ვაისმა თბილისში, Gebrüder Weiss - ის ლოგისტიკური ცენტრის ახალი ტერმინალის გახსნაზე მედიის წარმომადგენლებთან საუბრისას.
როგორც ვოლფრამ ზენგერ ვაისმა აღნიშნა, საქართველოში ეკონომიკური ვითარება პოზიტიურია. გარდა ამისა, მისი თქმით, საყურადღებოა, ქვეყნის გეოპოლიტიკური მდებარეობა, რადგან საქართველოდან ბიზნესს აქვს წვდომა სხვადასხვა ბაზარზე სამხრეთ კავკასიიდან ცენტრალურ აზიამდე. „ამიტომაც განვათავსეთ საქართველოში ჩვენი ბიზნესი. ეს ის გარემოებებია,რომლებმაც გადაგვაწყვეტინა საქართველოში პირველი ინვესტირება და შემდგომი გაფართოება, რამაც აბსოლუტურად გაამართლა,“ - აღნიშნა Gebrüder Weiss - ის აღმასრულებელმა დირექტორმა.
პირველმა ვიცე-პრემიერმა, ეკონომიკისა და მდგრადი განვითარების მინისტრმა ავსტრიული ლოგისტიკური კომპანია Gebrüder Weiss-ის (გებრუდერ ვაისი) თბილისში არსებული ლოგისტიკური ცენტრის ახალი ტერმინალის გახსნის ცერემონიაში მიიღო მონაწილეობა. ლევან დავითაშვილმა სიტყვით გამოსვლისას ქვეყანაში ტრანსპორტისა და ლოგისტიკის დარგის განვითარების და ზოგადად საქართველოს, როგორც საერთაშორისო სატრანსპორტო-ლოგისტიკური ჰაბად ჩამოყალიბების მნიშვნელობაზე ისაუბრა.
„ეს არის A კლასის, ძალიან მაღალი საერთაშორისო დონის ლოგისტიკური ცენტრი, რომელიც მოემსახურება როგორც ადგილობრივ მიწოდების ჯაჭვს, ასევე საერთაშორისო სატრანზიტო ოპერაციებს. და ეს ინვესტიცია სრულადაა თანხვედრაში ჩვენს პოლიტიკასთან, რომელიც ტრანსპორტს და ლოგისტიკას უკავშირდება - საქართველო ეტაპობრივად მართლაც ყალიბდება გლობალურ სატრანსპორტო-ლოგისტიკურ ჰაბად. მნიშვნელოვანია, რომ კომპანია ზუსტად ასე ხედავს მის მომავალს - ისინი საქართველოში დამატებით ინვესტიციებს დებენ იმის გამო, რომ პოტენციალს ხედავენ ჩვენს საერთაშორისო სატრანსპორტო მარშრუტებში, მათ შორის იქნება ეს ტრასეკა, თუ შუა დერეფნის პერსპექტივა“, - აღნიშნა პირველმა ვიცე-პრემიერმა.
ღონისძიებას დაესწრნენ ეკონომიკისა და მდგრადი განვითარების მინისტრის მოადგილე გურამ გურამიშვილი, ავსტრიის ელჩი საქართველოში რობერტ გერშნერი, Gebrüder Weiss-ის დამფუძნებელი ვოლფრამ ზინგერ ვაისი, რეგიონული დირექტორი ტომას მოზერი და „გებრუდერ ვაისი - საქართველოს“ დირექტორი სანდრო ხარლამოვი.
ავსტრიაში მდებარე Gebrüder Weiss Holding AG გლობალურად მომუშავე სრული ლოგისტიკური სერვისების მომწოდებელი კომპანიაა, 500 წელზე ხანგრძლივი ისტორიით. მისი ლოგისტიკური ტერმინალი საქართველოში 2012 წელს დაფუძნდა, ამ პერიოდის განმავლობაში კომპანიის საქმიანობა იზრდებოდა, ვითარდებოდა და წელს მან უკვე თბილისში არსებული ლოგისტიკური ცენტრის რიგით მესამე გაფართოებას დაასრულა.
კომპანიის ინფორმაციით, 2024 წელს ევროპული ინვესტიციების მოცულობამ 12 მილიონ ევრომდე შეადგინა, ხოლო ჯამურმა ინვესტიციებმა 30 მილიონ ევროს გადააჭარბა. როგორც ეკონომიკისა და მდგრადი განვითარების მინისტრმა აღნიშნა, საქართველოში კომპანიის მესამე გაფართოება მიუთითებს იმაზე, რომ ქვეყანაში ტრანსპორტის და ლოგისტიკის სფერო გეგმაზომიერად ვითარდება, არსებული პოლიტიკის შესაბამისად.
„საქართველოს ეკონომიკაში ერთ-ერთ პრიორიტეტული მიმართულებაა ჩვენი ტრანსპორტის და ლოგისტიკის სფეროში მაქსიმალურად გამოყენება, შესაბამისად, ქვეყანა აქტიურად არის ჩართული სატრანსპორტო დერეფნების განვითარებაში. ეს იდეები უკვე ნელ-ნელა ხორცს ისხამს და რეალიზდება ისეთი წარმატებული პროექტების სახით როგორიც არის Gebrüder Weiss-ის სასაწყობე ლოგისტიკური ბიზნესი. ზოგადად, ტრანსპორტის და ლოგისტიკის მიმართულებით ჩვენ გვაქვს მნიშვნელოვანი პროგრესი ბოლო წლების განმავლობაში და შეიძლება ითქვას, რომ იმ მნიშვნელოვან ეკონომიკურ ზრდაში რომელიც ქვეყანას გააჩნია, ეს სექტორები ძალიან დიდ როლს თამაშობს“, - განაცხადა პირველმა ვიცე-პრემიერმა.
ამასთან, ლევან დავითაშვილმა ხაზი გაუსვა, რომ ქვეყანას ბოლო წლებში თანმიმდევრული პოლიტიკის შედეგად მუდმივად აქვს ტვირთნაკადის ზრდა - 2024 წლის იანვარ-აგვისტოს პერიოდში საქართველოს სატრანსპორტო დარგების მიერ საერთაშორისო გადაზიდვების რეჟიმში გადაზიდულმა ტვირთების რაოდენობამ 18.7 მილიონი ტონა შეადგინა, რაც 2023 წლის ანალოგიურ პერიოდთან შედარებით 3.7%-ით მეტია. ასევე 2024 წლის იანვარ-აგვისტოში საავტომობილო ტრანსპორტით საერთაშორისო რეჟიმში გადაზიდულმა ტვირთების რაოდენობამ 10.5 მილიონი ტონა შეადგინა, რაც 2023 წლის ანალოგიურ პერიოდთან შედარებით 5.4% -ით მეტია. მინისტრის ინფორმაციით, მთავრობა ასევე ყოველწლიურად ასობით მილიონ ლარს ხარჯავს ქვეყანაში ინფრასტრუქტურის გაუმჯობესებაზე - ეს ერთ-ერთი ყველაზე მაღალი დანახარჯია მშპ-სთან მიმართებაში საჯარო ინფრასტრუქტურის მოდერნიზების კუთხით.
„როგორც იცით, სრულდება აღმოსავლეთ-დასავლების ჩქაროსნული მაგისტრალი, უკვე დავიწყეთ ანაკლიის პორტის მშენებლობა, გვაქვს თბილისის საერთაშორისო აეროპორტის განვითარების გეგმაც, და ეს ყველაფერი ხელს უწობს სწორედ ჩვენი ქვეყნის სატრანსპორტო-ლოგისტიკური პოტენციალის მაქსიმალურად გამოყენებას“, - განაცხადა ეკონომიკისა და მდგრადი განვითარების მინისტრმა.
