საქართველოს კონკურენციისა და მომხმარებლის დაცვის სააგენტომ GLOVO-ს მიერ "მომხმარებლის უფლებების დაცვის შესახებ" საქართველოს კანონის დარღვევის ფაქტი დაადგინა.
აღნიშნული გადაწყვეტილებით GCCA-მ იმსჯელა ქართულ ენაზე მომსახურების მიწოდების სტანდარტზე. მომხმარებელს უფლება აქვს, საქართველოს კანონმდებლობით დადგენილი წესით, მომსახურების ნებისმიერ ეტაპზე, მოითხოვოს და მიიღოს ინფორმაცია სახელმწიფო ენაზე, ხოლო სახელმწიფო ენის არცოდნა არ შეიძლება მომსახურების გაწევაზე უარის თქმის მოტივი იყოს.
GCCA-ის მომხმარებლის უფლებების დაცვის დეპარტამენტის უფროსის მოადგილის, ამათი ამაროვი „კომერსანტთან“ ამბობს, რომ GCCA-მ საქმის შესწავლა მიმართვის საფუძველზე დაიწყო.
მოქალაქე ჩიოდა, რომ კურიერი ქართულ ენას ვერ ფლობდა, რის გამოც მან შეკვეთა ვერ მიიღო. საკურიერო კომპანიას ხარვეზის აღმოსაფხვრელად 1-თვიანი ვადა მიეცა.
,,2024 წლის ბოლოს, კონკურენციისა და მომხმარებლის დაცვის სააგენტომ ერთ-ერთი მომხმარებლის განცხადება მიიღო, რომელიც ამბობდა, რომ „გლოვოს“ სერვისით შეკვეთა გააკეთა, მაგრამ იმის გამო, რომ კურიერი არაქართულენოვანი იყო, კომუნიკაცია ვერ შედგა.
მომხმარებელმა შეკვეთა ვერ მიიღო და კომპანიის თანხის დაბრუნების მოთხოვნით მიმართა, რომელიც არ დაკმაყოფილდა, სანამ GCCA-ს არ მიმართა და ჩვენ მისი მოთხოვნა არ დავაკმაყოფილეთ.
ნებისმიერ ეტაპზე, იქნება ეს წინარე ეტაპი თუ უშუალოდ, შეკვეთის მიღების დროს, ქართულ ენაზე მომსახურება აუცილებელია.
შესაბამისად, აღნიშნული მიმართვისას ჩვენ დავადგინეთ, უსამართლო კომერციული საქმიანობა, რაც უნდა აღმოიფხვრას.
კომპანია „გლოვოს“ 1-თვიანი ვადა განესაზღვრა, რა ვადაშიც ხარვეზი უნდა აღმოფხვრილიყო. ონლაინფორმატში ჩვენ შევხვდით GLOVO -ს ესპანურ წარმომადგენლობას. საქმე დასრულებული ჯერჯერობით არ არის, თუმცა დღეის მდგომარეობით, აპლიკაციაში ჩაშენებულია სპეციალური ფუნქცია, რომლის მიხედვითაც, როცა კურიერმა ქართული ენა არ იცის, მომხმარებელი უკავშირდება კომპანიის წარმომადგენლობას და ამ პროცესში კომპანიის წარმომადგენელი შუამავალი რგოლი ხდება. ის ხედავს, სად იმყოფება კურიერი, მომხმარებელი, კომუნიკაციაში ეხმარება და საქმე მარტივდება. როგორც კი დავინახავთ, რომ GLOVO-მ ხარვეზები აღმოფხვრა და მომხმარებლებს ქართულ ენაზე მომსახურების სრულფასოვნად მიღება შეუძლიათ, ვალდებულება შესრულებულად ჩაითვლება და ამით აღნიშნული „ქეისი“ დასრულდება.
ეს პრეცედენტული გადაწყვეტილებაა. ჩვენ არაერთი განცხადება მივიღეთ, რომელიც ზოგადად, ქართულ ენაზე მომსახურების არასრულფასოვნად მიღებას ან ვერ მიღებას შეეხებოდა.
„მომხმარებლის უფლებების დაცვის შესახებ“ საქართველოს კანონის მიხედვით სანამ ნივთს ან მომსახურებას შევიძენთ, სრული ინფორმაცია ქართულ ენაზე უნდა მივიღოთ. მომხმარებელს დამაზუსტებელი კითხვების დასმა სტანდარტულ პირობებთან დაკავშირებით არ უნდა სჭირდებოდეს, ინფორმაცია უნდა იყოს სრული და ამომწურავი”,- აღნიშნა ამაროვმა.
GCCA-ის მომხმარებლის უფლებების დაცვის დეპარტამენტის უფროსის მოადგილის განმარტებით, სააგენტოს თვითმიზანი მოვაჭრის დაჯარიმება არ არის, ამიტომაც პირველ ეტაპზე მათ გაფრთხილება და გონივრული ვადა ეძლევათ.
ამაროვი ასევე აღნიშნავს, რომ ქართულ ენაზე მომსახურების ვერ მიღება პრობლემაა არა მხოლოდ მიტანის სერვისში, არამედ კაფე-რესტორნებში, განსაკუთრებით კი ზღვისპირა რეგიონებში.
„ჩვენი კანონმდებლობა პრევენციული ხასიათის არის და პირდაპირ ჯარიმაზე არ გადავდივართ. დარღვევის დადასტურების შემთხვევაში, კომპანიებს გონივრულ ვადას ვაძლევთ. თუ ხარვეზი არ აღმოიფხვრა, უკვე გადავდივართ აღსრულების მექანიზმზე.
ჩვენი მიზანია, რომ სააგენტოსთან მიმართვა მაქსიმალურად გამარტივებული იყოს: თუ მომხმარებელს ელექტრონული ხელმოწერა აქვს, შეუძლია შეავსოს ფორმა და ელექტრონული ხელმოწერით გამოაგზავნოს, თუ არა- შეუძლიათ, ფორმა ჩამოტვირთონ, ხელი მოაწერონ და დასკანერებული გამოაგზავნონ.
გასათვალისწინებელია მინიმალური ინფორმაცია, მომხმარებლის ვინაობის თაობაზე, მოვაჭრის ვინაობა და მოკლე აღწერა, თუ რა პრობლემა შეექმნათ. სასურველია მტკიცებულებები, თუმცა თუ არ გააჩნიათ, ეს შემაფერხებელი არ იქნება. ჩვენ ვიწყებთ საქმის შესწავლას, ვითხოვთ მასალებს მოვაჭრისგან და 1 თვის ვადაში გადაწყვეტილებას ვიღებთ. ასევე, ზაფხულში, ზღვისპირა ქალაქებშიც დგას ეს პრობლემა, რიგ ობიექტებში მომხმარებლები ქართულ ენაზე ვერ სარგებლობდნენ მომსახურებით და სწორედ აქედან დავადგინეთ, რომ საქართველოში, პირველ რიგში, ქართულ ენაზე უნდა იქნეს ინფორმაცია მიწოდებული, თუმცა მოვაჭრე შეზღუდული არ არის და შეუძლია მომსახურება სხვა ენაზეც ჰქონდეს.
შესაძლოა, მომხმარებელი საერთოდ სხვა რამეს ითხოვდეს და მხოლოდ, მაგალითად, თანხის დაბრუნებით შემოიფარგლებოდეს, თუმცა ჩვენ კომპლექსურად ვიკვლევთ საკითხს.
2022 წლის შემდეგ, მომართვიანობა გაორმაგებულია და ცნობიერების ამაღლების მიზნით მუშაობას ვაგრძელებთ როგორც თბილისში, ასევე რეგიონებში“,- აღნიშნა ამათი ამაროვმა „კომერსანტის“ ეთერში.
