იტალიასა და ესპანეთში ტურისტებს მოუწევთ, ფეხსაცმლის არჩევანს მეტი ყურადღება მიაქციონ. ზოგიერთ ადგილას ჩუსტებითა და ღია სანდლებით გადაადგილება ან ავტომობილის მართვა შესაძლოა ჯარიმის მიზეზი გახდეს.
იტალიაში შეზღუდვა განსაკუთრებით ცნობილ ტურისტულ მიმართულებას, ჩინკვე-ტერეს ეროვნულ პარკს ეხება. აქ სანაპირო ბილიკები ხუთ თვალწარმტაც სოფელს აკავშირებს, თუმცა მარშრუტები ბევრად რთულია, ვიდრე ბევრი ტურისტი ელოდება. ზაფხულობით ამ ადგილს ათასობით ადამიანი სტუმრობს, მათ შორის საკრუიზო ლაინერების მგზავრები და ერთდღიანი მოგზაურები.
იტალიის ხელისუფლებამ ახალი წესები მას შემდეგ გაამკაცრა, რაც მაშველებს არაერთხელ მოუწიათ მთებიდან იმ ტურისტების ჩამოყვანა, რომლებიც კლდოვან და ციცაბო ბილიკებზე პლაჟის ფეხსაცმლით ავიდნენ და დაშავდნენ. ასეთ ადგილებში ჩუსტები და ღია სანდლები უსაფრთხო ფეხსაცმლად აღარ ითვლება, დარღვევისთვის კი ჯარიმა 50-დან 2500 ევრომდე შეიძლება იყოს.
ესპანეთში მსგავსი საკითხი ავტომობილის მართვას უკავშირდება. მძღოლს შესაძლოა 200 ევრომდე ჯარიმა დაეკისროს, თუ მისი ფეხსაცმელი უსაფრთხო მართვას უშლის ხელს. საუბარია ისეთ შემთხვევებზე, როცა ჩუსტები, თავისუფალი სანდლები, მაღალქუსლიანი ფეხსაცმელი ან ფეხშიშველი მართვა პედლებზე კონტროლს ამცირებს, მოძრაობას ზღუდავს ან რეაქციას ანელებს.
ამიტომ ტურისტებს ურჩევენ, ავტომობილში დახურული, ბრტყელძირიანი ფეხსაცმელი იქონიონ, ხოლო მთიან და დაცულ ტურისტულ მარშრუტებზე კედები ან სალაშქრო ფეხსაცმელი ჩაიცვან. ადგილობრივ წესებს კი წინასწარ უნდა გაეცნონ, განსაკუთრებით იმ ზონებში, სადაც უსაფრთხოების მოთხოვნები მკაცრად კონტროლდება.
