აშშ-ში ავტოსაგზაო შემთხვევებით გამოწვეული სიკვდილიანობა მცირდება, თუმცა ველოსიპედისტებისთვის გზებზე ვითარება კვლავ უარესდება. ქვეყნის საგზაო მოძრაობის უსაფრთხოების ეროვნული ადმინისტრაციის, NHTSA-ს მონაცემებით, 2025 წელს ავარიების შედეგად 1 148 ველოსიპედისტი დაიღუპა, რაც წინა წელთან შედარებით 4%-იანი ზრდაა და ბოლო ოთხ ათწლეულზე მეტი ხნის ერთ-ერთ უმაღლეს მაჩვენებელს უახლოვდება.
ამავდროულად, აშშ-ის გზებზე საერთო სიკვდილიანობის სტატისტიკა გაუმჯობესებულია. წინასწარი მონაცემებით, 2026 წლის პირველ კვარტალში ავტოსაგზაო შემთხვევებს დაახლოებით 7 700 ადამიანი ემსხვერპლა, რაც წინა წლის ანალოგიურ პერიოდთან შედარებით 4.3%-ით ნაკლებია. ყოველ 100 მილიონ გავლილ მილზე სიკვდილიანობის მაჩვენებელი 0.99-მდე შემცირდა, რაც პირველი კვარტლისთვის 2014 წლის შემდეგ საუკეთესო შედეგია.
თუ არსებული ტენდენცია შენარჩუნდება, 2026 შეიძლება ზედიზედ მეხუთე წელი გახდეს, როდესაც აშშ-ში გზებზე დაღუპულთა საერთო რაოდენობა მცირდება. თუმცა ეს გაუმჯობესება ველოსიპედისტებზე ჯერჯერობით არ ვრცელდება.
სპეციალისტები ველოსიპედისტთა სიკვდილიანობის ზრდას რამდენიმე ფაქტორს უკავშირებენ. მათ შორისაა ავტომობილების ზომისა და წონის მატება, მძღოლების ყურადღების გაფანტვა და ელექტროველოსიპედების სწრაფი გავრცელება. პრობლემას ამძაფრებს ისიც, რომ ველოსიპედების რაოდენობის ზრდას შესაბამისი ინფრასტრუქტურის, მათ შორის დაცული ველობილიკებისა და უსაფრთხო გზაჯვარედინების მოწყობა ვერ ეწევა.
განსაკუთრებით სახიფათოა დიდი ზომის SUV-ებსა და პიკაპებთან შეჯახება. მაღალი და მძიმე ავტომობილების შემთხვევაში ველოსიპედისტის შემჩნევა შესაძლოა გართულდეს, შეჯახების შედეგი კი უფრო მძიმე იყოს.
მონაცემები აჩვენებს, რომ მხოლოდ ავტომობილებში უსაფრთხოების ტექნოლოგიების განვითარება საკმარისი არ არის. ველოსიპედისტთა დაცვისთვის საჭიროა ქალაქების ინფრასტრუქტურის განახლება, მოძრაობის სიჩქარის შემცირება და ავტომობილებისგან ფიზიკურად გამოყოფილი ველობილიკების მოწყობა.
