ბელგია გრენლანდიაში მრავალეროვნულ სადაზვერვო მისიაში ჩაერთვება. ამის შესახებ ბელგიური მედია იუწყება.
ბელგიის თავდაცვის სამინისტროში განაცხადეს, რომ გრენლანდიაში ერთ ოფიცერს გააგზავნიან სადაზვერვო მისიაში მონაწილეობის მისაღებად და შემდგომი სამხედრო წვრთნების დაგეგმვისთვის.
„არქტიკის რეგიონში უსაფრთხოებას სტრატეგიული მნიშვნელობა აქვს მთელი ალიანსისთვის. ამ სადაზვერვო მისიაში მონაწილეობით ჩვენ ვადასტურებთ ჩვენს ერთგულებას ნატო-ს ფარგლებში და წვლილი შეგვაქვს კოლექტიურ ძალისხმევაში ამ სტრატეგიულად მნიშვნელოვანი რეგიონის უსაფრთხოების უზრუნველსაყოფად“, – განაცხადა ქვეყნის თავდაცვის მინისტრმა, თეო ფრანკენმა.
მისი თქმით, ბელგიის მონაწილეობაზე შემდგომი გადაწყვეტილებები მოკავშირეთა ნებისმიერ მომავალ ღონისძიებაში, მათ შორის ნატო-ს სამხედრო ოპერაციაში Arctic Sentry, მოგვიანებით იქნება მიღებული მთავრობის პარტნიორებს შორის მჭიდრო კონსულტაციების საფუძველზე.
ცნობისთვის, გრენლანდიაში სადაზვერვო მისიაში მონაწილეობის შესახებ მანამდე განაცხადეს საფრანგეთმა, გერმანიამ და ნიდერლანდებმა. სადაზვერვო მისია დანიელების ხელმძღვანელობით ტარდება. მისი მიზანია გრენლანდიაში მომავალი სამხედრო წვრთნებისთვის შესაძლებლობების შეფასება, ასევე რეგიონში ნატო-ს სამხედრო წარმომადგენლობის გაძლიერება.
მანამდე, გერმანიის თავდაცვის სამინისტრომ განაცხადა, რომ ევროპელების სადაზვერვო მისიის მიზანია იმის დადგენა, შესაძლებელია თუ არა მომავალში კუნძულის დასაცავად Eurofighter-ის ტიპის გამანადგურებლებისა და სამხედრო ხომალდების დისლოცირება.
15 იანვარს საფრანგეთის პრეზიდენტმა, ემანუელ მაკრონმა დააანონსა, რომ ევროპული ქვეყნების სამხედრო მისია გრენლანდიაში უახლოეს დღეებში გაძლიერდება სახმელეთო, საჰაერო და საზღვაო რესურსით.
ამასთან, თეთრ სახლში განაცხადეს, რომ გრენლანდიაში ევროპული ქვეყნების სამხედროების განთავსება გავლენას არ მოახდენს პრეზიდენტ დონალდ ტრამპის გეგმებზე კუნძულზე კონტროლის დამყარების შესახებ.
