პარიზის მონპარნასის ცათამბჯენი მრავალწლიანი რეკონსტრუქციისთვის დაიხურა და ბევრი პარიზელი ამას სიხარულით შეხვდა

პარიზის მონპარნასის კოშკი — ისტორიულ ცენტრში მდებარე ერთადერთი ცათამბჯენი — მასშტაბური რეკონსტრუქციისთვის დაიხურა. 210-მეტრიანი შენობა სრულ განახლებას გაივლის, რომელიც მინიმუმ ოთხი წელი გაგრძელდება.

კოშკი 1973 წელს აშენდა და მას შემდეგ მუდმივი დავის საგანია. ბევრი პარიზელი შენობას არამიმზიდველად მიიჩნევს და ხშირად „მეჭეჭს“ ან „შავ ქვრივს“ უწოდებს მისი მძიმე და ბნელი იერის გამო. სწორედ ამ შენობის აშენების შემდეგ აიკრძალა პარიზის ცენტრში სხვა მაღალსართულიანი ნაგებობების მშენებლობა. ადგილობრივები ხუმრობენ კიდეც, რომ მონპარნასის სახურავი პარიზში საუკეთესო ხედია, რადგან იქიდან თავად კოშკი არ ჩანს.

მიუხედავად კრიტიკისა, შენობა ტურისტებში პოპულარულია. 56-ე სართულზე არსებული სადამკვირვებლო მოედანი მილიონობით ადამიანმა მოინახულა, რადგან იქიდან ეიფელის კოშკის, ნოტრ-დამის ტაძრისა და ლუქსემბურგის ბაღის ხედები იშლება.

რეკონსტრუქციის შემდეგ მონპარნასი მუქი ბეტონის მასივიდან გამჭვირვალე მინის თანამედროვე კოშკად გადაიქცევა. ოფისების ნაცვლად აქ განთავსდება სასტუმრო, სტუდენტური საცხოვრებლები და სხვადასხვა მომსახურების სივრცეები.

ყველაზე საინტერესო ცვლილება სახურავზე იგეგმება — მოეწყობა ურბანული სათბური, დამონტაჟდება მზის პანელები და გაკეთდება ექვსი სპორტული მოედანი ჩოგბურთისა და მინი ფეხბურთისთვის. განახლებული მონპარნასის გახსნა 2030 წლისთვის იგეგმება.

პარიზის მონპარნასის კოშკის რეკონსტრუქციის ბიუჯეტი თავდაპირველად დაახლოებით 624 მილიონ ევროს შეადგენდა, თუმცა 2026 წლისთვის განახლებული შეფასებით ხარჯი გაიზარდა და უკვე 727.7 მილიონ ევრომდე ავიდა. რამდენიმე საერთაშორისო გამოცემა ასევე ასახელებს მრგვალ რიცხვს — 600 მილიონი ევრო+. პროექტი მთლიანად კერძო თანამფლობელების მიერ ფინანსდება და ეს პარიზში ერთ-ერთი ყველაზე მასშტაბური კერძო ურბანული განახლებაა.

რა გაკეთდება ზუსტად

210-მეტრიანი კოშკი ფაქტობრივად ახალ სიცოცხლეს მიიღებს და გარედან მთლიანად შეიცვლება:

  • ძველი მუქი, მძიმე ფასადი მოიხსნება და ჩანაცვლდება გამჭვირვალე მინის თანამედროვე გარსით
  • შენობა გახდება ბევრად უფრო ენერგოეფექტური
  • მოეწყობა ახალი ცენტრალური ლობი და შესასვლელი სივრცეები
  • დაემატება სასტუმრო
  • შენობაში დარჩება ოფისები, სავაჭრო და საზოგადოებრივი ზონები
  • ზედა სართულებზე განახლდება პანორამული სივრცეები და რესტორანი
  • სახურავზე გაკეთდება ურბანული სათბური, სადაც მოჰყავთ ბოსტნეული, ხილი და ყვავილები
  • დამონტაჟდება მზის პანელები
  • მოეწყობა სპორტული მოედნები (ჩოგბურთი, მინი ფეხბურთი და სხვა)
  • შენობის გარშემო სივრცეები გამწვანდება და უფრო ღია საჯარო ზონებად გადაიქცევა

მონპარნასი წლებია პარიზის ყველაზე არაპოპულარულ შენობად ითვლება. ახლა ქალაქი ცდილობს „სიძულვილის სიმბოლო“ გადააქციოს თანამედროვე, ეკოლოგიურ და ეკონომიკურად მომგებიან ღირსშესანიშნაობად.

წყაროები: