26 ოქტომბრის ღამეს ისრაელმა ირანზე საჰაერო დარტყმა განახორციელა. ისრაელის თავდასხმის სამიზნე იყო ირანის სამხედრო ბაზები თეირანის დასავლეთით და სამხრეთ-დასავლეთით. უფრო კონკრეტულად, თავდასხმის სამიზნეები იყო ყაზარმები და იარაღის საცავი თეირანში, - იტყობინება NBC წყაროებზე დაყრდნობით. NBC-ის ცნობით, ისრაელი არ უტევს ირანის ბირთვულ ობიექტებსა და ნავთობის საბადოებს, მხოლოდ სამხედრო მიზნებით შემოიფარგლება.The Jerusalem Post-ის ცნობით, ისრაელმა თავდასხმისთვის 100-ზე მეტი თვითმფრინავი გამოიყენა, მათ შორის F-35 სტელსი მებრძოლები 2 ათასი კილომეტრის მანძილზე.
ისრაელმა წინასწარ გააფრთხილა შეერთებული შტატები თავდასხმების შესახებ, იტყობინება CBS წყაროებზე დაყრდნობით. ერთ-ერთმა მათგანმა განაცხადა, რომ ვაშინგტონი არ მონაწილეობდა ისრაელის თავდასხმაში.
რა ხდებოდა მანამდე?
აშშ-ს შეიარაღებული ძალების ცენტრალური სარდლობის ინფორმაციით, ამერიკამ გერმანიიდან ახლო აღმოსავლეთში საჰაერო ძალების რამდენიმე F-16-ის ტიპის ავიაგამანადგურებელი გაგზავნა.
"გერმანიის შპანგდალემის საჰაერო ბაზაზე განლაგებული აშშ-ს საჰაერო ძალების F-16-ები 480-ე საბრძოლო ესკადრილიიდან აშშ-ს ცენტრალური სარდლობის პასუხისმგებლობის ზონაში ჩავიდნენ". - წერს ამერიკის ცენტრალური სარდლობა X-ზე.
ბოლოკვირებში ისრაელის სპეცსამსახურებმა და სამხედრო ძალებმა ჰეზბოლას წევრებზე იერიშებისა და თავდასხმებს ახალი ტალღა დაიწყეს. თავდაპირველად დაჯგუფების წევრებს აუფეთქდათ პეიჯერები, რის შედეგადაც, სულ მცირე, 12 მათგანი მოკვდა და ასობით კი დაშავდა. ისრაელის საჰაერო იერიშების შედეგად განადგურებულია დაჯგუფების ლიდერთა მნიშვნელოვანი ნაწილი: 27 სექტემბერს დარტყმების შედეგად მოკვდა ჰეზბოლას მეთაური, ჰასან ნასრალა, რაც ტერორისტული დაჯგუფებისთვის ბოლო ათწლეულებში უდიდესი დანაკარგებია.
მოგვიანებით, 1-ელ ოქტომბერს, ისრაელმა ლიბანის სამხრეთში ლიმიტირებული სახმელეთო ოპერაცია დაიწყო, ხოლო ირანმა ამავე დღეს ისრაელის მიმართულებით 180 ბალისტიკური რაკეტა გაუშვა, რომელთა "დიდი რაოდენობის" განეიტრალებაც ისრაელმა შეძლო.
ირანული რაკეტებისგან ისრაელის დაცვის პროცესში ასევე ჩართული იყო აშშ-ც, ხოლო იორდანიის საზოგადოებრივი უსაფრთხოების დირექტორატში განაცხადეს, რომ ირანიდან ისრაელისკენ გაშვებული დრონები და რაკეტები იორდანიის საჰაერო თავდაცვის სისტემებმაც ქვეყნის საჰაერო სივრცეში შესვლის დროს გაანეიტრალა.
IDF-ის ცნობით, ირანის იერიშის შედეგად "ძალიან ცოტა დარტყმა" მოხდა და ამ ეტაპზე, მათი ინფორმაციით, დაშავებულები არ არიან, რადგან "მოსახლეობა პასუხისმგებლობიანად მოიქცა".
მოგვიანებით, ისრაელის თავდაცვის ძალებმა პირობა დადო, რომ ირანის თავდასხმას ისრაელი პასუხს გასცემს: "ამ [სარაკეტო] იერიშს შედეგები მოჰყვება. ჩვენ გვაქვს გეგმები და ჩვენს მიერ შერჩეულ დროსა და ადგილზე ვიმოქმედებთ". - განაცხადა IDF-ის სპიკერმა, დანიელ ჰაგარიმ.
წყარო: ტაბულა
