მდინარე იორდანეს სანაპიროსთან სანათლავის და ქართული კულტურის ცენტრის პროექტირებაზე წელს მთავრობის სარეზერვო ფონდიდან 1.5 მილიონი ლარი დაიხარჯა - ამის შესახებ ბიუჯეტის შესრულების ანგარიშიდან ხდება ცნობილი. ამავე დოკუმენტიდან ირკვევა ასევე:

დოკუმენტში აღნიშნულია:

იორდანიის ჰაშიმიტურ სამეფოში, მდინარე იორდანეზე, მაცხოვრის ნათლობის ადგილის მიმდებარედ კულტურის ცენტრის დაარსებასა და მშენებლობასთან დაკავშირებული საპროექტო სამუშაოების დასაფინანსებლად - 967,000 ლარი;

იორდანიის ჰაშიმიტურ სამეფოში საქართველოს საელჩოს მიერ არქიტექტურულ-საკონსულტაციო ფირმისგან „Yousef Madanat Architeqture Studio“ მომსახურების შესყიდვის დასაფინანსებლად - 506,062 ლარი.

მდინარე იორდანეს სანაპიროზე ქართული კულტურის ცენტრის შექმნის ინიციატივა წინა პრემიერ-მინისტრის, ირაკლი ღარიბაშვილის მმართველობის პერიოდში დაანონსდა. ირაკლი ღარიბაშვილი ხელმძღვანელობდა სამთავრობო კომისიასაც, რომელიც ამ ცენტრის კოორდინაციას უზრუნველყოფდა.

საქართველოს კულტურის ცენტრი და სანათლავი მდინარე იორდანედან 15-20 მეტრის მანძილზეა დაშორებული, მიწის ფართობი კი 4,000 კვადრატულ მეტრს შეადგენს. საქართველოსთვის მიწის გადმოცემის ღონისძიებაში პრემიერ-მინისტრმა ირაკლი ღარიბაშვილმა იორდანიის ჰაშიმიტური სამეფოს პრინც ღაზისთან ერთად, 2022 წლის გაზაფხულზე მიიღო მონაწილეობა.

საქართველოს მთავრობამ ცენტრის მშენებლობის არქიტექტურული პროექტი 2023 წლის ნოემბერში დაამტკიცა. 

bm.ge