საპენსიო სააგენტომ განახორციელა 150 მილიონი ლარის ინვესტიცია ევროპის რეკონსტრუქციისა და განვითარების ბანკის (EBRD) გლობალური საშუალოვადიანი ობლიგაციების (GMTN) პროგრამის ფარგლებში განთავსებულ ევროობლიგაციებში. აღსანიშნავია, რომ მცურავი განაკვეთის მქონე ფასიანი ქაღალდები ლარშია დენომინირებული, ვადიანობა კი 5 წლით განისაზღვა. EBRD-ის უმაღლესი საკრედიტო რეიტინგის (AAA) მქონე ობლიგაციებში საპენსიო აქტივების ინვესტირება აუმჯობესებს საპენსიო სააგენტოს პორტფელის ხარისხს, ზრდის აქტივების დივერსიფიკაციას და ამასთან EBRD-თან გრძელვადიანი პარტნიორობის დასაწყისს წარმოადგენს. აღნიშნული ინვესტიცია ამყარებს საპენსიო სააგენტოს მიზანს, რომ კეთილსაიმედო ინვესტირების პრინციპების დაცვით განაგრძოს პორტფელის დივერსიფიკაცია, რათა საპენსიო აქტივები იმართოს უმაღლესი სტანდარტების მიხედვით.

საპენსიო სააგენტოს მთავარმა საინვესტიციო ოფიცერმა გოგა მელიქიძემ განაცხადა: „მოხარულები ვართ ამ ისტორიული ინვესტიციის წარმატებით დასრულებით. აღნიშნული ინვესტიცია მნიშვნელოვნად აუმჯობესებს საპენსიო აქტივების ხარისხს და ზრდის აქტივების დივერსიფიკაციას, რაც გრძელ ვადაში საპენსიო აქტივების მდგრადობას შეუწყობს ხელს. ამასთან, EBRD-თან მსგავსი ტიპის თანამშრომლობის დაწყება ხსნის კარებს სამომავლო შესაძლებლობებისთვის, რაც ხელს შეუწყობს საქართველოს კაპიტალის ბაზრის განვითარებას.”

„საპენსიო სააგენტოს მიერ ამ მნიშვნელოვანი ინვესტიციის განხორციელება არის EBRD-ის გრძელვადიანი სტრატეგიის ნაწილი, რომელიც მიზნად ისახავს პარტნიორ ქვეყნებში შეამციროს ადგილობრივი ეკონომიკების დამოკიდებულება უცხოური ვალუტის სესხებზე.” - განაცხადა EBRD-ის ხაზინის ასოცირებულმა დირექტორმა, აზიზ ჟურაევმა.

EBRD არის წამყვანი საერთაშორისო ფინანსური ინსტიტუტი, რომელიც მხარს 36 განვითარებად ეკონომიკას უჭერს. 1992 წელს საქართველოში მუშაობის დაწყების დღიდან, ბანკმა 5 მილიარდ ევროზე მეტი ინვესტიცია განახორციელა 300-ზე მეტ პროექტში – ფინანსურ, კორპორაციულ და ენერგეტიკის სექტორებში. ინვესტიციების 82% კერძო სექტორზე მოდის. აღნიშნული ობლიგაციებიდან მიღებული სახსრები სრულად იქნება გამოყენებული საქართველოს ეკონომიკის განვითარების, პროგრესის და ცხოვრების ხარისხის გაუმჯობესების მხარდასაჭერად.