წამლის სააგენტოს ყოფილი ხელმძღვანელი, ფარმაკოეკონომიკისა და პოლიტიკის კონსულტანტი თინა ტურძელაძე ქართული ფარმაცევტული ბაზარზე არსებულ რისკებზე ამახვილებს ყურადღებას და ამბობს, რომ „ბაზარზე უკვე გაჩნდა ველური ბაზრის ნიშნები. ამის შესახებ მან BMG tv-ის გადაცემა „ანალიტიკაში“ ისაუბრა.
მისი თქმით, თურქეთის ბაზრის გახსნით, საქართველოში იაფი წამლების შემოტანა კარგია, თუმცა რეგულირების ბერკეტები სახელმწიფოს ამ შემთხვევაში არ აქვს.
„ერთი სიკეთე, რომ იაფი წამალი გვინდა, იმიტომ, რომ თურქეთის ბაზარზე, მკაცრი რეგულირების გამო წამლები მართლა ძალიან იაფია, გვაძლევს მეორე რისკს, რომ თურქეთიდან შეიძლება შემოვიდეს სრულიად არა ის წამალი, რომელიც ჩვენ გვჭირდება და არა იმ ხარისხის, როგორი მოლოდინებიც გვაქვს. აქედან გამომდინარე, სახელმწიფოს პრაქტიკულად არ აქვს შესაძლებლობა, გადააკონტროლოს ეს. ამიტომ, ვფიქრობ, ჯობია, სისტემა იყოს გამართული, ფუნქციონირებდეს და იყოს გარანტია იმისა, რომ სისტემაში ლეგალურ არხებში მოხვედრილი წამლები ხარისხიანი იქნება. წინააღმდეგ შემთხვევაში ქართულ ფარმაცევტულ ბაზარზე უკვე გაჩნდა ველური ბაზრის ნიშნები, როდესაც არის ჩრდილოვანი აფთიაქები, როდესაც აფთიაქები ოპერირებენ როგორც მაღაზიები და ეს ძალიან მაღალი რისკის შემცველია“, - განაცხადა თინა ტურძელაძემ.
„ანალიტიკას“ ავტორისა და წამყვანის კითხვაზე - იცის თუ არა ჯანდაცვის სამინისტრომ, "ქართულმა ოცნებამ", საით მიდის არსებული ჯანდაცვის პოლიტიკით და რა რეკომენდაცია ექნებოდა დარგის წარმომადგენელს ფარმაცევტული დარგის მიმართულებით, თინა ტურძელაძე აცხადებს, რომ ჯანდაცვის სამინისტროში გამოწვევების შესახებ იციან, თუმცა ბაზრის განვითარებისა და სტანდარტიზაციისთვის მხოლოდ სურვილები და ლამაზი სიტყვები საკმარისი არაა და აუცილებელია ნორმატიული აქტების ამოქმდება, რომელიც ბაზრის განვითარების კურსს განსაზღვრავს.
„იციან, რომ აქვთ ბაზარზე ხარისხის, უსაფრთხოების, ეფექტურობის გამოწვევები, აქვთ ხელმისაწვდომობის გამოწვევები. ის, რომ ცალკეული ინსტრუმენტების შემოღება მიმდინარეობს, ეს უკვე ცხადყოფს იმას, რომ სწრაფვაც აქვთ იმისათვის, რომ შეცვალონ მოდელი და გადავიდნენ ML3 მოდელზე. მთავარი ამოცანა, როდესაც პრაქტიკულად ევროასოცირების ხელშეკრულებით ნაკისრი ვალდებულებებისთვის პროექტის მომზადება დაიწყო, საქართველოს პარლამენტში პირველი პრეზენტაცია იმით დაიწყო, რომ საქართველოს უნდა მოემზადებინა მარეგულირებელი სისტემა, ეგრეთ წოდებული მოწიფულობის მესამე დონით, იმიტომ, რომ მეოთხე დონე ახლა FDA და ევროპის წამლის სააგენტოა. საქართველო ამ რესურსის მფლობელი არ არის, მაგრამ ML3 ეს იყო რეალური მიზანი. ამ კანონპროექტით პრაქტიკულად ყველა ის ინსტრუმენტი, მეთოდოლოგიები შემუშავდა, რომლითაც საქართველომ ოპერირება უნდა დაიწყოს. დანარჩენი, ეს ლამაზი სიტყვები, სურვილები, სადღეგრძელოები, არ არის საკმარისი მიზნისთვის და შედეგისთვის. მთავარია, რომ ეს ინსტრუმენტები შემოღებული იქნეს, მიეცეს ნორმატიული აქტის სახე და დაიწყოს მისი იმპლემენტაცია. არ ვიცი სამინისტროს უდევს თუ არა ეს დოკუმენტი, ყოველ შემთხვევაში, საქართველოს პარლამენტს ნამდვილად უდევს და აქვს ჯანდაცვის მსოფლიო ორგანიზაციისგან, რომლის ტექნიკური დახმარებითაც მომზადდა. ეს აუცილებელია და მხოლოდ აი, ამის შემდეგ საჭირო იქნება კადრების გადამზადება და ასე შემდეგ, მაგრამ უკვე იქნება მიზანი და უკვე იქნება გზა, საითაც უნდა ვიაროთ. ესე ცალკეული ელემენტები, დავუშვათ, ის, რომ გაიხსნა თურქეთი, გაიხსნა თურქეთი ისე პროაქტიულად, რომ წარმოდგენა არ გვაქვს რა წამალი შემოვა თუ არა, რადგან მარეგულირებელს არ აქვს დოსიე, რაც აბსოლუტურად გაუმართლებელია“, - აცხადებს თინა ტურძელაძე.
