საქართველოში კვერცხი ძირითადად თურქეთიდან და უკრაინიდან შემოდის. თუმცა, მიმდინარე წელს ბაზარზე არც ერთი კვერცხის იმპორტი არ განხორციელებულა. თურქეთში ქათმის გრიპმა ფრინველების მასიური დახოცვა გამოიწვია, რის გამოც კვერცხის ფასმა საგრძნობლად მოიმატა. უკრაინაში კი საომარი მოქმედებები გრძელდება. „მეფრინველეობის განვითარების ასოციაციის“ ხელმძღვანელი ზურაბ უჩუმბეგაშვილი აცხადებს, რომ ადგილობრივ მეწარმეებს ბაზარზე არსებული მოთხოვნის დაკმაყოფილება სრულად შეუძლიათ. მისივე თქმით, დარგი უფრო სწრაფი ტემპით განვითარდება, რომ არა შიში. კვერცხის მწარმოებლები შიშობენ, რომ ბაზარი შესაძლოა იმპორტირებულმა პროდუქციამ შეავსოს და მათ გაზრდილი წარმოების პირობებში კვერცხის რეალიზება ვეღარ შეძლონ. ზურაბ უჩუმბეგაშვილს მაგალითად 2023 წელი მოჰყავს, როდესაც თურქეთიდან 60 მლნ.-ზე მეტი კვერცხი შემოვიდა, თუმცა ამის საჭიროება ქვეყანას არ ჰქონდა, რადგან მეწარმეებს ბაზარზე არსებული მოთხოვნის დაკმაყოფილება სრულად შეეძლოთ.
,,იმპორტი ძალიან დაუგეგმავად ხდება. 2023 წელს შემოვიდა 60 მლნ. კვერცხი. 2024 წელს 12 მლნ. წელს არც ერთი არ შემოსულა. ამ ციფრების შემყურემ, როგორ შეიძლება ჩვენ ობიექტურად დავგეგმოთ რამე. ადგილობრივი წარმოების დაცვასა და ხელშეწყობაზე მეტი ყურადღება რომ იყოს მიქცეული და არ ვიყოთ იმის შიშში, რომ ხვალ შეიძლება იმპორტმა წალეკოს ადგილობრივი ბაზარი, როგორც ეს იყო წლინახევრის წინ, კიდევ უფრო სწრაფად განვითარდებოდით. სრულად ვართ დამოკიდებული თურქეთის სწორ გათვლაზე. თურქეთს არ აქვს ხოლმე სწორი გათვლა, თუ რომელიმე ქვეყანამ ირანმა, სირიამ ან რომელიმე სხვა ქვეყანამ ჩაუკეტა საზღვარი და არ შეუშვა, ერთადერთი ქვეყანა სადაც თურქეთს შეუძლია კვერცხის შეტანა არის საქართველო. ამ დროს შემოდის ძალიან დიდი რაოდენობით კვერცხი. ამისი მაგალითია 2023 წელი. არ გვჭირდებოდა კვერცხის შემოტანა. წარმოება გამართული გვქონდა, რაოდენობაც გვქონდა, მაგრამ მათი ჭარბი წარმოების გამო 60 მლნ.-ზე მეტი კვერცხი შემოვიდა თურქეთიდან. ეს შიში რომ არ გვქონდეს და თავის დაცულობის პატარა განცდა, რომ გვქონდეს ჩვენ გაცილებით უფრო სწრაფად განვითარდებოდით, ვიდრე ახლა ვითარდებით.’’- აცხადებს ზურაბ უჩუმბეგაშვილი.
„მეფრინველეობის განვითარების ასოციაციის“ ხელმძღვანელი აღნიშნავს, რომ მარკეტების ქსელების განვითარებამ და გაფართოებამ დარგზე დადებითი გავლენა იქონია. კვერცხის მწარმოებლები წარმოებას სწორედ მარკეტებთან გაფორმებული ხელშეკრულების მიხედვით გეგმავენ.
,,რაოდენობის რეალიზაციას ხელი შეუწყო ქსელური მარკეტების განვითარებამ. ადრე ძალიან ბევრი წვრილი ფაბრიკა იყო და შესაბამისად ეს წვრილი ფაბრიკები ყველა პატარა მაღაზიაში შედიოდა. ახლა გამსხვილდა სავაჭრო სექტორი. ფაბრიკებს მიეცათ იმის საშუალება, რომ გრძელვადიანი პროგნოზირება გააკეთონ. ერთ წლიანი ხელშეკრულებები წინასწარ იდება და ვიცით რამდენი კვერცხი სჭირდება ამ თუ იმ ქსელს. ფაქტობრად ვცდილობთ გავზარდოთ წარმოება, რომ მიწოდება იყოს უწყვეტი. ქსელური მარკეტინგი გვეხმარება. კარგი იმიტომ არის, რომ ყველა ცდილობს ქართული პროდუქცია ჰქონდეს. ადგილობრივი მეწარმეები ვაწარმოებთ იმ რაოდენობას, რომ მივაწოდოთ. ჩვენ რადგან მყარი გარანტირებული კონტრაქტი, ხელშეკრულება გვაქვს დადებული ე.ი ვზრდით წარმოებას სტაბილურად.’’- აცხადებს ზურაბ უჩუმბეგაშვილი.
საქართველოში კვერცხზე მოთხოვნა იზრდება. საქსტატის მონაცემებითაც, მოხმარება ერთ სულ მოსახლეზე 1-2 ცალი კვერცხით მატულობს. „მეფრინველეობის განვითარების ასოციაციის“ ხელმძღვანელი აცხადებს, რომ ეს ტენდენცია არა მხოლოდ საქართველოში, არამედ მთელს მსოფლიოში შეინიშნება. ზურაბ უჩუმბეგაშვილი ამას იმით ხსნის, რომ გაზრდილია ცხოველურ ცილაზე მოთხოვნა. კვერცხი კი ერთ-ერთი ხელმისაწვდომი და მარტივად მოსამზადებელი პროდუქცია. მისივე თქმით, გაზრდილი მოთხოვნის პირობებში კვერცხზე ფასი არ გაიზრდება და შესაძლოა შემცირდეს კიდეც.
,,კვერცხზე მოთხოვნა მარტო საქართველოში არ გაზრდილა. მთელს მსოფლიოს რომ გადავხედოთ, ყველგან გაზრდილია. ცხოველურ ცხიმზე და ცხოველურ ცილაზე გაზრდილია მოთხოვნა და საქართველოშიც ასეა. რეალურად, კვერცხი ყველაზე ხელმისაწვდომი ცხოველური ცილაა. მოსამზადებლად ადვილია, დიეტურია და ყველანაირად სასარგებლო პროდუქტია. მოთხოვნის გაზრდა ამ შემთხვევაში პირიქით შედეგს გამოიღებს. ჩვენ ვზრდით წარმოებას და რაც უფრო დიდი გაქვს წარმოება და ნაკლები დანახარჯი გაქვს თვითღირებულება გიმცირდება. იგივე კადრით და იგივე მოცემულობით შეგვიძლია უფრო მეტი ვაწარმოოთ. შესაბამისად, მოთხოვნილების გაზრდა არანაირად არ გამოიწვევს ფასის ზრდას, პირიქით ღირებულება შეიძლება შემცირდეს კიდეც’’- აცხადებს ზურაბ უჩუმბეგაშვილი.
