ხელოვნური ინტელექტის ინფრასტრუქტურის სტარტაპმა Fireworks AI-მ ახალი საინვესტიციო რაუნდის ფარგლებში 1.505 მილიარდი დოლარი მოიზიდა, რის შედეგადაც კომპანიის ღირებულებამ 17.5 მილიარდ დოლარს მიაღწია.
Series D-ის დაფინანსების რაუნდს Atreides Management-ი, Index Ventures-ი და TCV ხელმძღვანელობდნენ. ინვესტორებს შორის ასევე იყვნენ Nvidia, Lightspeed Venture Partners, Evantic Capital, Bessemer Venture Partners, Menlo Ventures და სხვა საინვესტიციო კომპანიები.
Fireworks AI-ის წლიურმა შემოსავლის ტემპმა უკვე 1 მილიარდ დოლარს გადააჭარბა, რაც წინა წლის მაჩვენებელზე ხუთჯერ მეტია. ამავე პერიოდში კომპანიის პლატფორმაზე ყოველდღიურად დამუშავებული მონაცემების მოცულობა 15 ტრილიონიდან 40 ტრილიონზე მეტ ტოკენამდე გაიზარდა.
სტარტაპის სწრაფ ზრდას ბიზნესების მხრიდან შედარებით იაფ და მოქნილ ხელოვნური ინტელექტის სისტემებზე მზარდი მოთხოვნა უწყობს ხელს. უახლესი დახურული AI-მოდელების გამოყენება კომპანიებისთვის ძვირი ჯდება, რის გამოც ისინი სულ უფრო ხშირად განიხილავენ ღია მოდელებს, რომელთა საკუთარ მონაცემებსა და სამუშაო პროცესებზე მორგება შეუძლიათ.
Fireworks კომპანიებს საშუალებას აძლევს, ზოგადი დანიშნულების AI-მოდელები საკუთარი მონაცემებით განავითარონ, კონკრეტულ დავალებებს მოარგონ და შემდგომ მათ მუშაობას ღრუბლოვანი ინფრასტრუქტურით უზრუნველყონ.
კომპანიის განცხადებით, მის პლატფორმაზე დამუშავებული ტოკენების 95%-ზე მეტი მომხმარებლების საკუთრებაში არსებულ მონაცემებზე მორგებულ სპეციალიზებულ მოდელებზე მოდის. Fireworks-ის მომსახურებით სარგებლობენ Uber, Shopify, Doximity, Elastic, GitLab და MongoDB. პლატფორმას იყენებენ იურიდიული AI კომპანია Harvey და პროგრამული კოდის შექმნის ინსტრუმენტი Cursor-იც.
Fireworks AI 2022 წელს Meta-ს ყოფილმა ინჟინრებმა დააფუძნეს. კომპანია ხელოვნური ინტელექტის ინფრასტრუქტურის ბაზარზე კონკურენციას უწევს როგორც სპეციალიზებულ სტარტაპებს, მათ შორის Together AI-სა და Baseten-ს, ისე Amazon-ისა და Google-ის მსგავს მსხვილ ღრუბლოვან პროვაიდერებს.
კომპანია მოზიდული კაპიტალის გამოყენებას საინჟინრო გუნდის გაფართოების, გლობალური გამოთვლითი სიმძლავრეების ზრდისა და Microsoft-სა და Nvidia-სთან თანამშრომლობის გაღრმავებისთვის გეგმავს.
Fireworks-ის შეფასება განსაკუთრებით სწრაფად გაიზარდა. 2025 წლის ოქტომბერში კომპანიამ 250 მილიონი დოლარი მოიზიდა და 4 მილიარდ დოლარად შეფასდა. შესაბამისად, ერთ წელზე ნაკლებ პერიოდში მისი შეფასება ოთხჯერ მეტით გაიზარდა.
სტარტაპის ზრდა აჩვენებს, რომ ხელოვნური ინტელექტის ბაზარზე კონკურენცია მხოლოდ ყველაზე მძლავრი მოდელის შექმნაზე აღარ არის დამოკიდებული. ბიზნესებისთვის სულ უფრო მნიშვნელოვანი ხდება მოდელის ღირებულება, სიჩქარე, საკუთარი მონაცემებით მართვის შესაძლებლობა და კონკრეტულ ამოცანებზე მორგება.
წყაროები
https://qz.com/fireworks-ai-series-d-fundraise-valuation-open-source-071626
https://fireworks.ai/blog/series-d-announcement
