უკრაინა დათანხმდა, არ შეუტიოს არარუსულ ნავთობტანკერებსა და შავი ზღვის იმ ინფრასტრუქტურას, რომელიც ყაზახური ნავთობის ექსპორტისთვის გამოიყენება. Bloomberg-ის ინფორმაციით, შეთანხმება აშშ-ის მაღალჩინოსნებსა და უკრაინის ხელმძღვანელობას შორის მოლაპარაკებების შემდეგ შედგა.
შეთანხმების მთავარი მიზანი შავი ზღვის გავლით ნავთობის სტაბილური მიწოდების აღდგენაა. ბოლო კვირებში დრონებით განხორციელებულმა თავდასხმებმა ნოვოროსიისკთან მდებარე კასპიის მილსადენის კონსორციუმის, CPC-ის, ტერმინალის მუშაობა რამდენჯერმე შეაფერხა.
Reuters-ის მონაცემებით, ივლისში CPC-ის ნავთობის ჩატვირთვის მოცულობა დაგეგმილ მაჩვენებელთან შედარებით 20%-ზე მეტად შემცირდა და დღეში დაახლოებით 1.2-1.3 მილიონ ბარელამდე ჩამოვიდა. საერთაშორისო ბაზარმა ივლისში დაახლოებით 400 ათასი ბარელი ნავთობი დღიურად დაკარგა. უკრაინას აღნიშნულ თავდასხმებზე პასუხისმგებლობა არ აუღია.
CPC ყაზახეთის ნავთობის ექსპორტისთვის კრიტიკული მარშრუტია. სისტემა ქვეყნის ნედლი ნავთობის ექსპორტის დაახლოებით 80%-ს ემსახურება და გლობალური ნავთობის მიწოდების დაახლოებით 2%-ზე მოდის. მილსადენი ყაზახეთის საბადოებს რუსეთის შავი ზღვის პორტ ნოვოროსიისკთან აკავშირებს.
შავი ზღვის რეგიონში თავდასხმების გახშირებამ ბოლო კვირებში არა მხოლოდ ნავთობის მიწოდება შეამცირა, არამედ გადაზიდვის ხარჯებიც გაზარდა. Reuters-ის მიხედვით, შავ ზღვაში ნავთობტანკერის საშუალო დღიური ღირებულება ერთ კვირაში დაახლოებით 200 ათასი დოლარიდან 300 ათას დოლარზე მეტად გაიზარდა, ხოლო საომარი რისკის დაზღვევის ღირებულებამ ზოგ შემთხვევაში გემის ღირებულების 2%-ს მიაღწია.
წყაროები:
Bloomberg-ის მასალის გადაბეჭდილი ვერსია:
https://au.finance.yahoo.com/news/ukraine-agrees-avoid-targeting-tankers-023210721.html
Reuters, CPC-ის ივლისის ნავთობის მიწოდების შესახებ:
https://www.reuters.com/business/energy/drone-attacks-reduce-july-cpc-oil-loadings-by-fifth-sources-say-2026-08-07/
Reuters, შავ ზღვაში გადაზიდვებისა და დაზღვევის გაძვირების შესახებ:
https://www.reuters.com/world/surge-black-sea-attacks-adds-strain-global-commodity-flows-2026-08-05/
