ნავთობის ფასმა დღეს ბოლო ხუთი სავაჭრო სესიის განმავლობაში პირველად მოიმატა. ინვესტორების ყურადღება გაეროს გენერალური ასამბლეის ფარგლებში აშშ-სა და ირანს შორის შესაძლო მოლაპარაკებებისკენ არის მიმართული. ამის შესახებ Reuters წერს.
Brent-ის ნოემბრის ფიუჩერსები 1.7%-ით, 102.06 დოლარამდე გაიზარდა, ხოლო WTI-ის ოქტომბრის კონტრაქტი, რომლის ვადაც სამშაბათს იწურება, ასევე 1.7%-ით, 97.40 დოლარამდე გაძვირდა. ნოემბრის უფრო აქტიურად ვაჭრობადი WTI-ის კონტრაქტის ფასი 1.4%-ით, 93.65 დოლარამდე გაიზარდა.
ბაზრისთვის ერთ-ერთი მთავარი საკითხი აშშ-ისა და ირანის შესაძლო დიალოგია. დონალდ ტრამპმა განაცხადა, რომ ირანის პრეზიდენტ მასუდ ფეზეშქიანთან შეხვედრის შესაძლებლობას არ გამორიცხავს. Reuters-ის ცნობით, ირანმა მოლაპარაკებების განახლებისთვის საკუთარი პირობებიც გადასცა შუამავლებს.
ანალიტიკოსების შეფასებით, ამ ეტაპზე ფასების ზრდა, შესაძლოა მოკლევადიანი იყოს, ვიდრე ბაზარზე ფუნდამენტური ცვლილების ნიშანი. ნავთობის ბაზარი დიპლომატიური პროცესის განვითარების მიმართ განსაკუთრებით მგრძნობიარეა.
ამავდროულად, მიწოდების მხრივ მდგომარეობა გარკვეულწილად გაუმჯობესდა. საუდის არაბეთმა ჰორმუზის სრუტით ნავთობის ექსპორტი გაზარდა — კვირას სპარსეთის ყურეში შვიდ სუპერტანკერზე დაახლოებით 14 მილიონი ბარელი ნავთობი ჩაიტვირთა.
