შვედეთის ქალაქ სედერტელიეში, რომელიც სტოკჰოლმიდან დაახლოებით 30 კილომეტრში მდებარეობს, ყვავების გამოყენება ქუჩებიდან სიგარეტის ნამწვების შესაგროვებლად გადაწყვიტეს. თითოეული შეგროვებული ნამწვის სანაცვლოდ ფრინველები მცირე საკვებით დაჯილდოვდებიან.
იდეა სტარტაპ Corvid Cleaning-ს ეკუთვნის. კომპანიამ სპეციალური აპარატი შექმნა: ყვავმა მიწიდან სიგარეტის ნამწვი უნდა აიღოს, მოწყობილობასთან მიიტანოს და სპეციალურ ღიობში ჩააგდოს. ამის შემდეგ აპარატი ფრინველს მცირე ჯილდოს, მაგალითად, არაქისს აძლევს.
ყვავების გაწვრთნა ეტაპობრივად იგეგმებოდა. თავდაპირველად მათ უნდა დაემახსოვრებინათ, რომ ნამწვის ჩაგდებას საკვები მოჰყვებოდა, შემდეგ კი აპარატთან ურთიერთობა და მცირე საგნების მასში მოთავსება ესწავლათ. საბოლოო ეტაპზე ფრინველებს ნამწვები უკვე დამოუკიდებლად უნდა მოეძებნათ და მოწყობილობასთან მიეტანათ.
პროექტის ავტორებმა ყვავები მათი მაღალი ინტელექტის გამო შეარჩიეს. ამ ფრინველებს რთული ამოცანების გადაჭრა, სხვადასხვა ინსტრუმენტის გამოყენება და ჯილდოს მისაღებად საჭირო მოქმედებების თანმიმდევრობის დამახსოვრება შეუძლიათ. ისინი ერთმანეთისგანაც კარგად სწავლობენ, რის გამოც სტარტაპში ვარაუდობენ, რომ ახალი უნარი შესაძლოა ფრინველთა გუნდებში თანდათან გავრცელდეს.
Keep Sweden Tidy Foundation-ის მონაცემებით, შვედეთის ქალაქებში ქუჩაში დაყრილი ნარჩენების 60%-ზე მეტი სიგარეტის ნამწვებია.
