ვოევოდინის რადიო-ტელევიზიის (RTV) რეგიონული საზოგადოებრივი მაუწყებლის ჟურნალისტებმა ეთერში განაცხადეს, რომ მაუწყებელი წლების განმავლობაში ქვეყანაში მიმდინარე მოვლენების შესახებ ცალმხრივ ინფორმაციას ავრცელებდა. განცხადება „სტუდენტური სიის“ საპარლამენტო არჩევნებში გამარჯვებისა და ალექსანდრ ვუჩიჩის დამარცხების შემდეგ გავრცელდა.
„ვოევოდინის რადიო-ტელევიზიის ზოგიერთმა თანამშრომელმა განაცხადა, რომ საზოგადოებრივი მაუწყებელი, წლებია, თავის ფუნქციას ვერ ასრულებს: დუმს, პრობლემებზე თვალს ხუჭავს, ცალმხრივ ინფორმაციას გადმოსცემს, მოვლენებს კრიტიკის გარეშე აშუქებს, სწორ კითხვებს ან საერთოდ არანაირ კითხვებს არ სვამს. ამიტომ მაყურებლის წინაშე ბოდიში გვმართებს“, – აღნიშნულია განცხადებაში.
ჟურნალისტების თქმით, ეთიკური პრინციპების დაცვით თავისუფლად მუშაობისთვის იბრძოდნენ, მაგრამ ამ ბრძოლამ სასურველი შედეგი ვერ გამოიღო. მიუხედავად ამისა, ამბობენ, რომ პროფესიული და დამოუკიდებელი ჟურნალისტიკისთვის ბრძოლის გაგრძელება მნიშვნელოვანია.
აღსანიშნავია, რომ ვოევოდინის ადმინისტრაციულ ცენტრში, ნოვი სადში, რკინიგზის სადგურში ბეტონის კონსტრუქცია ჩამოინგრა და 16 ადამიანი დაიღუპა. სწორედ ეს გახდა ალექსანდრ ვუჩიჩის მთავრობის წინააღმდეგ დემონსტრაციების დასაწყისი.
ცნობისთვის, უნგრეთის საპარლამენტო არჩევნებში პეტერ მადიარის გამარჯვების შემდეგ ქვეყნის ახალმა მთავრობამ განაცხადა, რომ სახელმწიფო მედია წლების განმავლობაში ყოფილი პრემიერის, ვიქტორ ორბანის მთავრობის პროპაგანდას ეწეოდა. მთავრობამ მაუწყებელს დროებითი მენეჯმენტი დაუნიშნა და თანამშრომლები, რომელთაც ორბანის მიმართ მიკერძოებაში ადანაშაულებდნენ, გაათავისუფლა. მოგვიანებით უნგრეთის სახელმწიფო ტელევიზიამ (M1) საინფორმაციო გამოშვებები შეაჩერა და ეთერში შავი ეკრანის ფონზე გამოაქვეყნა განცხადება, რომ სიცრუის გამო საზოგადოებას ბოდიშს უხდიან.
