2026 წლის იანვარ-სექტემბერში საქართველომ ჩინეთიდან 119 081 ვიზიტორს უმასპინძლა, რაც გასული წლის ანალოგიური პერიოდის მაჩვენებელს 23.6%-ით, ანუ 22 748 ვიზიტორით აღემატება. ამის შესახებ ტურიზმის ეროვნული ადმინისტრაციის სტატისტიკური მონაცემები მოწმობს.
ადმინისტრაციის მონაცემებით, მიმდინარე წლის პირველ ცხრა თვეში ჩინეთიდან ვიზიტორთა რაოდენობამ 2011 წლიდან, სტატისტიკის ხელმისაწვდომ პერიოდში, იანვარ-სექტემბრის რეკორდულ მაჩვენებელს მიაღწია.
ზრდის მასშტაბი კიდევ უფრო თვალსაჩინოა წინა წლების სრულ მონაცემებთან შედარებით. 2026 წლის ცხრა თვეში ჩინეთიდან მიღებული ვიზიტორების რაოდენობამ 2025 და 2024 წლების გარდა, 2011 წლიდან დაფიქსირებული ყველა სხვა წლის წლიურ მაჩვენებელს გადააჭარბა.
შედარებისთვის, ჩინეთიდან ვიზიტორთა რაოდენობა 2025 წელს 127 895-ს, 2024 წელს კი 88 583-ს შეადგენდა. 2023 წელს საქართველოში ჩინეთიდან 48 304 ვიზიტორი შემოვიდა, 2019 წელს — 48 071, ხოლო 2018 წელს — 31 855.
ტურიზმის ეროვნული ადმინისტრაციის სტატისტიკის თანახმად, ჩინეთიდან ვიზიტორთა რაოდენობა 2020-2022 წლებში მკვეთრად შემცირდა, თუმცა მომდევნო წლებში ზრდის ტენდენცია განახლდა.
რაც შეეხება საქართველოში საერთაშორისო ვიზიტებს, 2026 წლის იანვარ-სექტემბერში საერთაშორისო მოგზაურების 6 112 078 ვიზიტი განხორციელდა. ეს 2025 წლის შესაბამისი პერიოდის მაჩვენებელს 2 323 ვიზიტით, დაახლოებით 0.04%-ით აღემატება.
ამასთან, მიმდინარე წლის პირველ ცხრა თვეში საქართველოში საერთაშორისო ტურისტული ვიზიტების რეკორდული რაოდენობა დაფიქსირდა. სულ 4 404 872 ტურისტული ვიზიტი განხორციელდა, რაც გასული წლის ანალოგიურ პერიოდთან შედარებით 97 778-ით, ანუ 2.3%-ით მეტია.
