გლობალური გეოპოლიტიკური რისკები რჩება მაღალ დონეზე და შეიძლება გამოიწვიოს აქტივების ფასების მკვეთრი ვარდნა, გაზარდოს სახელმწიფო სესხების ხარჯები და საფრთხე შეუქმნას ფინანსური სისტემის სტაბილურობას. ამის შესახებ ნათქვამია საერთაშორისო სავალუტო ფონდის ბლოგში, რომელიც ეფუძნება აპრილის გლობალური ფინანსური სტაბილურობის ანგარიშს.
ანგარიშში აღნიშნულია, რომ ისეთ მოვლენებს, როგორიცაა ომები, დიპლომატიური დაძაბულობა ან ტერორისტული თავდასხმები, აქვთ საერთაშორისო ვაჭრობისა და ინვესტიციების შეფერხების პოტენციალი. ეს, თავის მხრივ, გავლენას ახდენს აქტივების ფასებზე, ფინანსური ინსტიტუტების მუშაობასა და ბიზნესის დაკრედიტებაზე, რაც ძირს უთხრის ეკონომიკურ აქტივობას.
საერთაშორისო სავალუტო ფონდის გამოთვლებით, საშუალოდ, ძირითადი გეოპოლიტიკური მოვლენების დროს, საფონდო ინდექსები თვეში 1%-ით ეცემა, ხოლო განვითარებად ბაზრებზე 2,5%-ით. მასშტაბური სამხედრო კონფლიქტების შემთხვევაში, როგორიცაა რუსეთის შეჭრა უკრაინაში 2022 წელს, კლებამ შეიძლება თვეში 5%-მდე მიაღწიოს.
