აშშ-ის სამხედრო ძალებმა იემენის სანაპიროსთან ოპერაციის დროს შემთხვევით საკუთარი F/A-18 Hornet ტიპის გამანადგურებელი ჩამოაგდეს. აშშ-ის ცენტრალური სარდლობის ინფორმაციით, ორივე პილოტმა კატაპულტირება მოასწრო, ერთ-ერთმა მსუბუქი დაზიანებები მიიღო. შემთხვევა 21 დეკემბერს მოხდა.
„სარაკეტო კრეისერმა USS Gettysburg-მა შეცდომით გაუხსნა ცეცხლი გამანადგურებელს, რომელიც ავიამზიდ Harry S. Truman-იდან აფრინდა. ინციდენტი არ იყო დაკავშირებული მტრის ცეცხლთან, მიმდინარეობს ყოვლისმომცველი გამოძიება“, – ნათქვამია განცხადებაში.
აშშ-ის სამხედროები რეგიონში იმყოფებიან იემენელი ჰუსიტების დაჯგუფებების მხრიდან მიმდინარე საფრთხის გამო. 21 დეკემბერს ამერიკულმა ძალებმა კვლავ განახორციელეს დარტყმები ჰუსიტების პოზიციებზე იემენის დედაქალაქ სანას მახლობლად. ამერიკელმა სამხედროებმა ასევე ჩამოაგდეს რამდენიმე ჰუსიტური დრონი და ფრთოსანი რაკეტა.
Associated Press-ი წერს, რომ აღნიშნული ინციდენტი ხაზს უსვამს იმას, თუ რამდენად საშიში გახდა წითელი ზღვის დერეფანი ირანის მიერ მხარდაჭერილი „ჰუსიტების“ მიერ გემებზე განხორციელებული თავდასხმების გამო, მიუხედავად იმისა, რომ აშშ-ისა და ევროპის სამხედრო კოალიციები ამ ტერიტორიაზე პატრულირებენ.
„მართვადი სარაკეტო კრეისერი USS Gettysburg შეცდომით იქნა გასროლილი მოიერიშე თვითმფრინავი F/A-18-ი ჩამოაგო“, - ნათქვამია ცენტრალური სარდლობის განცხადებაში.
მფრინავები შემთხვევით მაშინ ჩამოაგდეს, როდესაც აშშ-ის სამხედროები „ჰუსიტი“ მეამბოხეების წინააღმდეგ საჰაერო თავდასხმებს ახორციელებდნენ. აშშ-ის სამხედრო ცენტრალურ სარდლობაში არ აკონკრეტებენ, რა მისიას ასრულებდნენ ისინი, თუმცა აცხადებენ, რომ მათმა სამხედრო ხომალდებმა და თვითმფრინავებმა მანამდე „ჰუსიტების“ დრონები და ხომალდსაწინააღმდეგო ფრთოსანი რაკეტა ჩამოაგდეს.
ცნობისთვის, ღაზის სექტორში ისრაელსა და „ჰამასს“ შორის ომის დაწყების შემდეგ, ისლამისტების მოკავშირე მეამბოხეები რეგულარულად ახორციელებენ თავდასხმებს რაკეტებით, დრონებით ისრაელის ტერიტორიაზე და წითელ ზღვაში მოძრავ გემებზე. საპასუხოდ, ამერიკულ სამხედრო ძალებს ჰუსიტების ობიექტებსა და შეიარაღებაზე მიაქვს იერიშები. აშშ-სთან ერთად წითელ ზღვაში თავდასხმების პრევენციის ოპერაციებში სხვა დასავლური ქვეყნებიც, მათ შორის დიდი ბრიტანეთიც მონაწილეობს.
წყარო: 1 არხი
