მსოფლიოს უმსხვილესი აქტივების მმართველი კომპანიის, BlackRock-ის თანადამფუძნებელი და აღმასრულებელი დირექტორი ლარი ფინკი ხელოვნური ინტელექტის ბაზარზე ფინანსური ბუშტის წარმოქმნას მთავარ საფრთხედ არ მიიჩნევს. მისი შეფასებით, AI ინდუსტრიის რეალური პრობლემა მონაცემთა ცენტრების, ელექტროენერგიისა და გამოთვლითი სიმძლავრეების არასაკმარისი მიწოდებაა.
CNBC-სთან ინტერვიუში ფინკმა განაცხადა, რომ ხელოვნური ინტელექტის ინფრასტრუქტურაზე მოთხოვნა დღეს მიწოდებას მნიშვნელოვნად აღემატება. მისი თქმით, ეს ტენდენცია განსაკუთრებით მკაფიოდ ჩანს მეხსიერების ჩიპებისა და სხვა ტექნოლოგიური კომპონენტების ბაზარზე.
მიუხედავად იმისა, რომ მსოფლიოს უმსხვილესი ტექნოლოგიური კომპანიები AI ინფრასტრუქტურაში ასობით მილიარდ დოლარს ხარჯავენ, ფინკი მიიჩნევს, რომ არსებული ინვესტიციები მოთხოვნის დასაკმაყოფილებლად საკმარისი არ არის.
მისი მთავარი შეშფოთება აშშ-ის ელექტროენერგეტიკულ ინფრასტრუქტურას უკავშირდება. ახალი მონაცემთა ცენტრები უზარმაზარ ენერგეტიკულ სიმძლავრეს მოითხოვს, ელექტროსადგურებისა და გადამცემი ქსელების განვითარება კი ამ მოთხოვნის ზრდას ვერ ეწევა.
ფინკის შეფასებით, ერთი გიგავატის სიმძლავრის AI მონაცემთა ცენტრის განვითარებას დაახლოებით 50-60 მილიარდი დოლარი სჭირდება. ასეთ პროექტში შედის მიწა, შენობა, სერვერები, ჩიპები, ქსელური მოწყობილობები, გაგრილების სისტემები და ელექტროენერგიის მიწოდებისთვის საჭირო ინფრასტრუქტურა.
BlackRock უკვე მონაწილეობს ამ მიმართულების დაფინანსებაში. ფინკის განცხადებით, კომპანიამ პენსილვანიაში თითქმის ერთი გიგავატის მოცულობის ენერგეტიკულ პროექტზე შეთანხმება გააფორმა და აშშ-ის სხვა შტატშიც მონაცემთა ცენტრის განვითარებას აფინანსებს.
„ფინანსური ბუშტის კი არ მეშინია, არამედ იმის, რომ საკმარისად სწრაფად ვერ ვაშენებთ“, — განაცხადა BlackRock-ის ხელმძღვანელმა.
გამოთვლითი სიმძლავრე შესაძლოა ახალ აქტივად ჩამოყალიბდეს
ფინკი პროგნოზირებს, რომ ხელოვნური ინტელექტისთვის საჭირო გამოთვლითი სიმძლავრე მომავალში ცალკე საინვესტიციო აქტივად ჩამოყალიბდება. მისი შეფასებით, ბაზარზე შესაძლოა გაჩნდეს ფიუჩერსული კონტრაქტები, რომლებიც კომპანიებს გამოთვლითი რესურსების მომავალი ფასისა და ხელმისაწვდომობის დაზღვევის შესაძლებლობას მისცემს.
მსგავსი ბაზარი იმავე პრინციპით იმუშავებს, როგორითაც დღეს ნავთობის, ბუნებრივი აირისა და სხვა საქონლის ფიუჩერსები ფუნქციონირებს. AI კომპანიებსა და მონაცემთა ცენტრების ოპერატორებს წინასწარ შეეძლებათ გამოთვლითი სიმძლავრის ღირებულების დაფიქსირება და ფასების მერყეობის რისკის შემცირება.
ფინკის შეფასებით, აშშ-სა და ევროპას ინფრასტრუქტურის განვითარების დაჩქარება სჭირდება, რათა ხელოვნური ინტელექტის გლობალურ რბოლაში ჩინეთს არ ჩამორჩეს. მისი თქმით, ჩინეთი პარალელურად ავითარებს მონაცემთა ცენტრებს, ელექტროგენერაციასა და გადამცემ ქსელებს, რაც ტექნოლოგიური სექტორის ზრდისთვის აუცილებელ საფუძველს ქმნის.
BlackRock-ის აქტივებმა $15.3 ტრილიონს გადააჭარბა
ლარი ფინკის განცხადებები BlackRock-ის 2026 წლის მეორე კვარტლის ფინანსური შედეგების გამოქვეყნებას მოჰყვა. საანგარიშო პერიოდში კომპანიის მართვის ქვეშ არსებული აქტივების მოცულობამ რეკორდულ 15.3 ტრილიონ დოლარს მიაღწია.
მეორე კვარტალში BlackRock-მა 192 მილიარდი დოლარის წმინდა შემოდინება მიიღო, ხოლო ბოლო 12 თვის განმავლობაში ეს მაჩვენებელი 868 მილიარდ დოლარს შეადგენდა. კომპანიის შემოსავალი წლიურად 31%-ით, საოპერაციო მოგება კი 42%-ით გაიზარდა.
ფინკი მომდევნო 12 თვის განმავლობაში საფონდო ბაზრების მიმართ ოპტიმისტურად არის განწყობილი. მისი შეფასებით, ხელოვნური ინტელექტი და სხვა ტექნოლოგიები კომპანიებს პროდუქტიულობისა და მოგების მარჟების გაზრდაში დაეხმარება.
BlackRock-ის მაგალითზე ფინკმა აღნიშნა, რომ კომპანიის მართვის ქვეშ არსებული აქტივები მნიშვნელოვნად გაიზარდა, თანამშრომლების რაოდენობა კი თითქმის უცვლელი დარჩა. მისი თქმით, ტექნოლოგიებმა კომპანიას იმავე ადამიანური რესურსით უფრო დიდი მოცულობის ოპერაციების მართვის შესაძლებლობა მისცა.
ფინკის პოზიციით, AI-ის მთავარი ეკონომიკური რისკი დღეს ტექნოლოგიაში ზედმეტი ინვესტიცია კი არა, ელექტროენერგიის, მონაცემთა ცენტრებისა და სხვა კრიტიკული ინფრასტრუქტურის არასაკმარისი ტემპით განვითარებაა.
