შობადობის კლების გამო, სკოლებში მოსწავლეთა რაოდენობის შემცირებაა მოსალოდნელი.
საქართველოში შობადობის შემცირება მომდევნო წლებში სკოლებში მოსწავლეთა რაოდენობაზეც აისახება. Galt & Taggart-ის პროგნოზით, დაახლოებით ხუთ წელიწადში ქვეყანაში მოსწავლეთა საერთო რაოდენობა 8%-ით შემცირდება.
შემცირების მთავარი მიზეზი ბოლო წლებში დაბადებული ბავშვების რაოდენობის კლებაა. ეს თაობები ეტაპობრივად მიაღწევენ სასკოლო ასაკს, რის გამოც სკოლებში ახალი მოსწავლეების ნაკადი შემცირდება.
მიუხედავად საერთო კლებისა, კერძო სკოლების სექტორში განსხვავებული ტენდენციაა მოსალოდნელი. Galt & Taggart-ის შეფასებით, კერძო სკოლებში მოსწავლეთა რაოდენობა 2028/2029 სასწავლო წლისთვის დაახლოებით 73 ათასამდე გაიზრდება. ამჟამად კერძო სკოლებში დაახლოებით 66.5 ათასი მოსწავლე სწავლობს.
კერძო სკოლებზე მოთხოვნის ზრდას მოსახლეობის შემოსავლების მატება, სწავლის ხარისხთან დაკავშირებული მოლოდინები და თბილისში მოსახლეობის კონცენტრაცია განაპირობებს. თუმცა მოსწავლეთა საერთო რაოდენობის შემცირება გრძელვადიან პერიოდში როგორც საჯარო, ისე კერძო სკოლებისთვის მნიშვნელოვან გამოწვევად დარჩება.
ცნობისთვის, Galt & Taggart-ის კვლევა „Education Sector in Georgia“. ოფიციალურ ანგარიშში განხილულია საქართველოში ზოგადი და უმაღლესი განათლების სექტორი, მოსწავლეთა დემოგრაფიული პროგნოზი, კერძო სკოლებში ჩარიცხვები და სექტორის ფინანსური მდგომარეობა. ანგარიშის მიხედვით, შობადობის კლების ფონზე სკოლის ასაკის მოსახლეობა შემცირდება, თუმცა კერძო სკოლებში მოსწავლეთა რაოდენობის ზრდაა მოსალოდნელი — დაახლოებით 66.5 ათასიდან 73.1 ათასამდე 2028/2029 სასწავლო წლისთვის.
