თემა: უცხოელი სტუდენტები საქართველოს ეკონომიკაში $500 მილიონს დახარჯავენ.
2028 წლისთვის საქართველოში უცხოელი სტუდენტების რაოდენობა შესაძლოა დაახლოებით 48 ათასამდე გაიზარდოს, ხოლო მათი ეკონომიკური კონტრიბუცია 500 მილიონ აშშ დოლარს მიაღწიოს.
Galt & Taggart-ის პროგნოზით, უცხოელი სტუდენტების რაოდენობის ზრდას ხელს უწყობს საქართველოში სწავლისა და ცხოვრების შედარებით ხელმისაწვდომი ღირებულება, ასევე ინდოეთსა და ახლო აღმოსავლეთის ქვეყნებთან გაუმჯობესებული საჰაერო კავშირები.
უცხოელი სტუდენტების ზრდა მხოლოდ განათლების სექტორისთვის არ არის მნიშვნელოვანი. მათი ხარჯები პირდაპირ აისახება ბინების გაქირავებაზე, კვებისა და საცალო ვაჭრობის სექტორზე, ავიაციაზე, საბანკო მომსახურებასა და კერძო ჯანდაცვაზე.
შესაბამისად, უცხოელი სტუდენტები საქართველოსთვის განათლების ექსპორტის ერთ-ერთ მთავარ წყაროდ ყალიბდებიან და ეკონომიკის სხვადასხვა სექტორში დამატებით მოთხოვნას ქმნიან.
კვლევის მიხედვით, სექტორის შემდგომი ზრდის ერთ-ერთ მთავარ გამოწვევად ინგლისურენოვანი ლექტორებისა და კვალიფიციური აკადემიური პერსონალის დეფიციტი რჩება.
