34 სასტუმრო და ათწლეულების პარტნიორობის დასასრული - რატომ დატოვა Meliá-მ კუბა?
ესპანურმა სასტუმროების ჯგუფმა Meliá-მ კუბაში საქმიანობა სრულად შეწყვიტა. კომპანიამ კუნძულზე დარჩენილი ოპერაციები დახურა და საერთო ჯამში 34 სასტუმროს მართვაზე უარი თქვა.
Meliá გადაწყვეტილების მიზეზებად ასახელებს სამართლებრივ, ფინანსურ და ოპერაციულ სირთულეებს, რომლებიც აშშ-ის სანქციების გამკაცრებამ და კუბის ეკონომიკურმა კრიზისმა კიდევ უფრო გააღრმავა.
Meliá კუბაში 1990 წლიდან მუშაობდა და ქვეყნის ტურისტული სექტორის ერთ-ერთი მთავარი უცხოელი პარტნიორი იყო. კომპანიის გასვლა სიმბოლურადაც მნიშვნელოვანია, რადგან კუბა ათწლეულების განმავლობაში საერთაშორისო ტურიზმს უცხოური ვალუტის მიღების ერთ-ერთ მთავარ წყაროდ იყენებდა.
პირველ ეტაპზე Meliá-მ 15 სასტუმროს მართვა შეწყვიტა. მოგვიანებით კი კომპანიამ კუნძულის დატოვება სრულად გადაწყვიტა. მისი განცხადებით, არსებული გარემო აღარ იძლეოდა ბრენდის, მარკეტინგისა და მენეჯმენტის მომსახურების გაგრძელების შესაძლებლობას.
კუბის ტურისტული სექტორის პრობლემები მხოლოდ Meliá-ს არ ეხება. სხვა საერთაშორისო სასტუმროების ჯგუფებმა და ავიაკომპანიებმაც შეამცირეს ან შეწყვიტეს საქმიანობა. პრობლემას ამძაფრებს ენერგოდეფიციტი, ხშირი ელექტროგათიშვები, სურსათისა და მედიკამენტების დეფიციტი, საბანკო გადარიცხვების სირთულე და საერთაშორისო გადახდის სისტემებზე შეზღუდული წვდომა.
აშშ-ის ახალი შეზღუდვები კუბის ტურიზმის სამინისტროსა და სახელმწიფოსთან დაკავშირებულ ბიზნესსტრუქტურებსაც შეეხო. რადგან სასტუმროების დიდი ნაწილი სახელმწიფო ან სამხედრო კონგლომერატებთან პარტნიორობით მუშაობს, უცხოურ კომპანიებს სანქციების დარღვევის სამართლებრივი რისკი ექმნებათ.
Meliá-ს გასვლა მნიშვნელოვან პრობლემას უქმნის ადგილობრივ დასაქმებასაც. საერთაშორისო ბრენდის სასტუმროები პირდაპირ ასაქმებს ათასობით ადამიანს, ხოლო ირიბად ხელს უწყობს რესტორნებს, ტრანსპორტს, სოფლის მეურნეობას, ტურისტულ გიდებსა და მცირე მოვაჭრეებს.
კუბისთვის ყველაზე რთული არა მხოლოდ სასტუმრო ოთახების დაკარგვა, არამედ საერთაშორისო გაყიდვებისა და მარკეტინგის არხებიდან მოწყვეტაა. ცნობილ ბრენდებს აქვთ გლობალური დაჯავშნის სისტემები, ტუროპერატორებთან კონტრაქტები და მომხმარებელთა ნდობა. მათი ჩანაცვლება ადგილობრივი მენეჯმენტით სწრაფად ვერ მოხდება.
შედეგად, კუბა შეიძლება კიდევ უფრო დამოკიდებული გახდეს შეზღუდული რაოდენობის პარტნიორ ქვეყნებზე და შედარებით დაბალშემოსავლიან ტურისტულ ბაზრებზე.
