Rolls-Royce მხოლოდ ძვირად ღირებული ავტომობილების ბრენდი არ არის. ბრიტანული კომპანია უკვე წლებია მუშაობს აეროკოსმოსურ და ბირთვულ ინჟინერიაში, ახლა კი იაპონიასთან ახალ პარტნიორობას იწყებს.
გაფორმებული შეთანხმება Rolls-Royce-ს, იაპონურ მხარესა და გაერთიანებული სამეფოს ეროვნულ ბირთვულ ლაბორატორიას შორის თანამშრომლობას ითვალისწინებს. მისი მთავარი მიზანი ახალი თაობის ბირთვული ტექნოლოგიების განვითარებაა, მათ შორის მაღალტემპერატურული აირგაცივებადი რეაქტორების მიმართულებით.
თემა განსაკუთრებით აქტუალური მას შემდეგ გახდა, რაც სოციალურ ქსელებში გავრცელდა ინფორმაცია, თითქოს იაპონიამ Rolls-Royce-სთან რეაქტორების მშენებლობაზე პირდაპირი კონტრაქტი გააფორმა. სინამდვილეში, ამ ეტაპზე საუბარია არა მშენებლობაზე, არამედ კვლევაზე, ტექნოლოგიურ განვითარებასა და ერთობლივ სამუშაოებზე.
Rolls-Royce-ს ბირთვულ სფეროში გამოცდილება ახალი არ არის. კომპანია ბრიტანული წყალქვეშა ნავებისთვის ბირთვული ძალური დანადგარების შექმნაში დიდი ხანია მონაწილეობს და პარალელურად მცირე მოდულური რეაქტორების, ე.წ. SMR ტექნოლოგიის განვითარებაზეც მუშაობს.
ბირთვული ენერგიის მიმართ ინტერესი ბოლო წლებში არაერთ ქვეყანაში იზრდება. ამის მიზეზი წიაღისეულ საწვავზე დამოკიდებულების შემცირების სურვილი და შედარებით სტაბილური, დაბალემისიიანი ენერგიის წყაროების ძიებაა. თუ ახალი თაობის რეაქტორები მოლოდინებს გაამართლებს, ისინი მომავალში სუფთა ენერგეტიკის ერთ-ერთ მნიშვნელოვან მიმართულებად შეიძლება იქცეს.
ამ ეტაპზე შეთანხმება უფრო ტექნოლოგიური თანამშრომლობისა და კვლევის ეტაპია, თუმცა Rolls-Royce-ისა და იაპონიის პარტნიორობა აჩვენებს, რომ გლობალური ენერგეტიკული გარდაქმნის პროცესში ბირთვული ტექნოლოგიები კვლავ მნიშვნელოვან როლს ინარჩუნებს.
