„დავაყენე საკითხი არამარტო ფასების რეგულირების, არამედ მთლიანი ეკონომიკური სისტემის რეორგანიზაციის შესახებ“, - ამის შესახებ შპს „ბარაქას“ დამფუძნებელმა ვაჟა ბერიძემ "ფასების კომისიასთან" მწარმოებლების შეხვედრის შემდეგ განაცხადა.
ვაჟა ბერიძის თქმით, ფასწარმოქმნისა და ფასების რეგულირების საკითხი ქვეყნისთვის სასიცოცხლოდ მნიშვნელოვანია.
„მადლიერება მინდა გამოვხატო ხელისუფლების მიმართ, რომ ძალზე აქტუალური საკითხი წამოჭრა, ფასწარმოქმნა და ფასების რეგულირება. ეკონომისტი ვარ, ეკონომიკის დოქტორი და ეს თემები უაღრესად მნიშვნელოვანია ქვეყნისთვის. ფასი თვითღირებულების გარეშე არ არსებობს და სწორედ მას ეფუძნება. ათეულობით წლების განმავლობაში კატასტროფული მდგომარეობა იყო. ამიტომ დავაყენე საკითხი არა მხოლოდ ფასების რეგულირების, არამედ მთლიანი ეკონომიკური სისტემის რეორგანიზაციის შესახებ“, — განაცხადა ბერიძემ.
მისი თქმით, ლიბერალურმა ეკონომიკურმა პოლიტიკამ, როგორც საქართველოში, ისე გლობალურად, საკუთარი რესურსი ამოწურა. „ლიბერალური პოლიტიკა არა მხოლოდ საქართველოში, არამედ მთელ მსოფლიოში, მათ შორის აშშ-შიც, შეიცვალა. საჭიროა ანალიტიკური ჯგუფების შექმნა და სისტემური მიდგომა“, - აღნიშნა მან.
