დღის Top 10 საინტერესო ამბავი:
1. სახმელეთო საზღვრები გაიხსნა, კომენდანტის საათი რჩება - მთავრობას ტურიზმის 50%-იანი აღდგენის იმედი აქვს
14 თვიანი პაუზის შემდეგ საქართველომ სახმელეთო საზღვრები გახსნა. ქვეყანაში შემოსვლა მხოლოდ იმ პირებს შეეძლებათ ვისაც სრული ორჯერადი ვაქცინაციის დამდასტურებელი მოწმობა და PCR ტესტის უარყოფითი პასუხი ექნებათ, ან მხოლოდ ბოლო 72 სთ-ში ჩატარებული PCR ტესტის უარყოფითი პასუხი, ასეთ შემთხვევაში ვიზიტორს შემდეგი 72 სთ-ის განმავლობაში ტესტის განმეორებით ჩატარების ვალდებულება ეკისრება.
2. ეკონომიკური ბუმი თუ რიცხვებით მანიპულირება - რამ გამოიწვია მშპ-ის 44.8%-იანი ზრდა?
საქსტატის ცნობით აპრილში ეკონომიკა 44.8%-ით გაიზარდა. გასული წლის ანალოგიურ პერიოდში ვარდნა 16.6% იყო. შარშანდელი ლოკდაუნის ფონზე, წელს ორნიშნა ზრდა მოულოდნელობა არ ყოფილა, მაგრამ ზრდის ტემპმა მაინც გაკვირვება გამოიწვია.
3. „გაჩერებული პროექტების სია დიდია, თქვენ საკმარისად მოაცდინეთ ქვეყანა“ - ქეთი ბოჭორიშვილი გახარიას
თქვენ საკმარისად მოაცდინეთ ქვეყანა, სჯობს, აწი დაისვენოთ - ამ შესახებ ეკონომიკის მინისტრის ყოფილი მოადგილე ქეთი ბოჭორიშვილი facebook-ზე წერს. იგი ყოფილ პრემიერის და პარტია „საქართველოსთვის“ თავმჯდომარის გიორგი გახარიას გუშინდელ სატელევიზიო ეთერს ეხმაურება, სადაც ყოფილი პრემიერი მედიის კითხვებს 2 საათის განმავლობაში პასუხობდა.
4. შეუსრულებელი ვალდებულებები და 1,5 მილიონ დოლარიანი ბიზნეს დავა - ექსკლუზიურ ინტერვიუ ნიკოლოზ ბასილაშვილის ინვესტორთან
მსოფლიოს 36-ე ჩოგანს ნიკოლოზ ბასილაშვილს ახალი გრძელვადიანი სასამართლო განხილვა ელოდება. ჩოგბურთელს ყოფილი ინვესტორი, ირაკლი კაჭარავა კონტრაქტით გათვალისწინებული საკომისიოს ანაზღაურებას სთხოვს. ბიზნესმენი „კომერსანტთან“ ექსკლუზიურ ინტერვიუში დეტალურად ყვება როგორ დაიწყო ყველაფერი, რატომ ჩოგბურთი და რატომ ბასილაშვილი?
5. „ნესტლემ“ აღიარა, რომ მათი პროდუქციის უმეტესობა არაჯანსაღია
მსოფლიოში კვების პროდუქტების უმსხვილესმა მწარმოებელმა, შვეიცარიულმა ტრანსნაციონალურმა კორპორაცია „ნესტლემ“ აღიარა, რომ მათ მიერ წარმოებული პროდუქციის 60% ჯანსაღი კვების საერთაშორისოდ მიღებულ ნორმებს არ შეესაბამება - ამის შესახებ Financial Times-ი წერს. წყარო აქვეყნებს კომპანიის პრეზენტაციასაც, რომელიც ტოპ-მენეჯერებს შორის გავრცელდა. უფრო მეტიც, „ნესტლეს“ პროდუქტების რამდენიმე ხაზი, ვერასდროს გახდება ჯანსაღი, რამდენჯერაც არ უნდა განაახლოს მწარმოებელმა.
6. „ტურისტების კოვიდ დაზღვევაზე მუშაობის დაწყება ცოტა დაგვიანებულია, რადგან დღეს საზღვრები უკვე იხსნება“ - რას მოიცავს 30 ათას ლარამდე ლიმიტის მქონე პაკეტები?
უცხო ქვეყნის მოქალაქეებისთვის საქართველოში ვიზიტისას covid-დაზღვევის პოლისი სავალდებულო იქნება, საკითხზე მთავრობა სადაზღვევო კომპანიებთან ერთად მუშაობს. დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, ამ საკითხზე უკვე მომზადებულია ცვლილებები, რომელიც უწყებათშორის საბჭოს უნდა წარედგინოს.
7. წელიწად-ნახევრის წინ გაყიდული ანანოვების სასახლის რეაბილიტაცია ისევ არ დაწყებულა
მეოცე საუკუნეში ფრანგი ძმების, ანანოვების მიერ აგებული ისტორიული შენობა, რომელიც ერთ დროს სამთავრობო რეზიდენციის ფუნქციასაც ასრულებდა, ისევ ახალი სიცოცხლის მოლოდინშია. წლების განმავლობაში სასახლემ ძალიან ბევრი მფლობელი გამოიცვალა, ბოლოს ანანოვების მამული 2020 წლის იანვარში 1 375 000 ლარად შპს „ინვესტ ჯგუფმა“ საინვესტიციო ვალდებულებით შეისყიდა. ხელშეკრულების გაფორმებიდან წელიწად-ნახევარი გავიდა, კომერსანტი დაინტერესდა როგორ მიმდინარეობს ისტორიულ ტერიტორიაზე ტურისტული ინფრასტრუქტურის მოეწყობა.
8. გია ხუხაშვილი: გახარია-კალაძის ტანდემი იქნებოდა „ქართული ოცნების“ საბოლოოდ ჩამოშლის ფორმულა
გახარია-კალაძის ტანდემი შეიძლება ისე საინტერესოდ გამოიყურებოდეს, რომ შეუძლია „ქართული ოცნების“ საბოლოო ჩამოშლა, - განაცხადა რადიო თავისუფლების „დილის საუბრებში“ პოლიტიკის ანალიტიკოსმა გია ხუხაშვილმა ექსპრემიერ გიორგი გახარიას პოლიტიკური პარტიის სამომავლო პერსპექტივებზე საუბრისას. გადაცემაში მან აღნიშნა, რომ ექსპრემიერ გიორგი გახარიასა და თბილისის მერის, კახა კალაძის პოლიტიკურ ტანდემს, შექმნის შემთხვევაში, ვერც ბიზნესმენი ბიძინა ივანიშვილი მოუხერხებს რამეს.
9. გეოგრაფია - რუსეთის მთავარი ეკონომიკური იარაღი ევროპის წინაამღდეგ
თვითმფრინავები, რომლებიც ევროპიდან შორეულ აღმოსავლეთში მიფრინავენ, თითქმის ერთსა და იგივე მარშრუტს იყენებენ - მისი დიდი ნაწილი რუსეთის საჰაერო სივრცეზე გადის. უზარმაზარი, თითქმის დაუსახლებელი ტერიტორია - სწორედ ეს არის ევროპასთან შესაძლო ეკონომიკურ ომში რუსეთის მთავარი იარაღი. ბევრად უფრო მნიშვნელოვანი ვიდრე ბუნებრივი რესურსები - ნავთობის და გაზის ყიდვა სხვაგანაც შეიძლება, აი გეოგრაფიას კი ვერანაირად ვერ შეცვლი.
10. ბრიტანეთის სტუმარ-მასპინძლობის სექტორი მიგრანტების გამო გადარჩენისსთვის იბრძვის
პანდემიის პერიოდში მიგრანტების საკუთარ ქვეყნებში დაბრუნების შედეგად, ბრიტანეთის სტუმარ-მასპინძლობის სექტორი გადარჩენისსთვის იბრძვის. კორონავირუსით დაღლილი ბრიტანელები შეზღუდვების მოხსნის შემდეგ რესტორნებს, პაბებს და სასტუმროებს მიაწყდნენ, თუმცა მათი მომსახურება პერსონალის დეფიციტის გამო პრობლემაა.