მსოფლიოში კვების პროდუქტების უმსხვილესმა მწარმოებელმა, შვეიცარიულმა ტრანსნაციონალურმა კორპორაცია „ნესტლემ“ აღიარა, რომ მათ მიერ წარმოებული პროდუქციის 60% ჯანსაღი კვების საერთაშორისოდ მიღებულ ნორმებს არ შეესაბამება - ამის შესახებ Financial Times-ი წერს. წყარო აქვეყნებს კომპანიის პრეზენტაციასაც, რომელიც ტოპ-მენეჯერებს შორის გავრცელდა. უფრო მეტიც, „ნესტლეს“ პროდუქტების რამდენიმე ხაზი, ვერასდროს გახდება ჯანსაღი, რამდენჯერაც არ უნდა განაახლოს მწარმოებელმა.
ასევე გავცელებულ პრეზენტაციაში ნათქვამია, რომ ჯანსაღი კვების ავსტრალიური ინდექსის მიხედვით, „ნესტლეს“ კვებისა და სასმელი პროდუქტის მხოლოდ 37%-მა (ცხოველების საკვებისა და სამკურნალო საბავშვო საკვების გარდა) მიიღო 3,5 ქულა, მაქსიმალური 5 ქულიდან. კომპანიის წარმოებული პროდუქტების საერთო პორტფელის ფარგლებში დაახლოებით 70%-მა ვერ მიაღწია შეფასების საშუალო მაჩვენებელს, ნათქვამია პრეზენტაციაში. სასმელების 96%-მა, (გარდა ყავისა) ასევე საკონდიტრო ნაწარმის 99%-მა და ნესტლეს ნაყინის პროდუქციამ, ასევე ვერ გადალახა 3.5 ქულიანი ბარიერი.
წყალი და რძის პროდუქტები ყველაზე „ჯანსაღი“ ხაზი აღმოჩნდა - წყლის 82% და რძის პროდუქტების 60% ამ 3.5 ბალიან ბარიერს აღწევს. „ჩვენ მნიშვნელოვან გაუმჯობესებას მივაღწიეთ ჩვენს წარმოებაში, მაგრამ ჩვენი პორტფელი კვლავინდებურად არ შეესაბამება ჯანსაღი კვების ნორმებს მაშინ, როდესაც რეგულატორის მხრიდან ზეწოლა და მომხმარებლისგან მოთხოვნა მკვეთრად იზრდება“ - ნათქვამია კომპანიის პრეზენტაციაში.
ამავე მოხსენებაში წარმოდგენლი იყო რამდენიმე მავნე პროდუქტიც - ესენია პიცა Digiorno ხორცით, რომელიც ნატრიუმის დღიური ნორმის 40%-ს შეიცავს, ხოლო პიცა Hot Pockets პეპერონით - ნატრიუმის დღიური ნორმის 48%-ს.
„ნესტლე“ აწარმოებს ხსნად ყავას, მინერალლურ წყალს, შოკოლადს, ნაყინს, რძის პროდუქტებს, საბავშვო კვების პროდუქტს, შინაური ცხოველების საკვებს, ფარმაცევტულ პროდუქციას და კოსმეტიკას. „ნესტლეს“ ძირითადი სავაჭრო ბრენდებია - KitKat, Maggi, Nescafe, Nesquik, Nestea.
ამ წლის თებერვალში ამერიკაში დაფუძნებულმა უფლებადამცველთა ჯგუფმა - International Rights Advocates(IRA) -მა ფედერალური კოლექტიური სარჩელი შეიტანა Nestle-ს, Mars-ის და Cargill-ის წინააღმდეგ, არასწრულწლოვანთა შრომის გამოყენებისა და ადამიანებით ვაჭრობაში თანამონაწილეობის ბრალდებით. სარჩელი სასამართლოში მალის 8 მოქალაქის სახელით შევიდა, რომლებმაც განაცხადეს, რომ ბავშვობაში იძულებული იყვნენ კოტ-დივუარში კაკაოს მარცვლები მონურ პირობებში მოეგროვებინათ. „ნესტლეს“ წარმომადგენელმა მაშინ განაცხადა, რომ კომპანია „მკვეთრ პოლიტიკას ატარებს ბავშვების შრომითი ექსპლუატაციის წინააღმდეგ და აღნიშნული პრობლემის მოგვარებაზე მუშაობს“. კომპანიაში ასევე განაცხადეს, რომ სასამართლო პროცესი „ხელს ვერ უწყობს ამ საერთო მიზანს.“
financial times
მარიამ მორგოშია