უცხო ქვეყნის მოქალაქეებისთვის საქართველოში ვიზიტისას covid-დაზღვევის პოლისი სავალდებულო იქნება, საკითხზე მთავრობა სადაზღვევო კომპანიებთან ერთად მუშაობს. დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, ამ საკითხზე უკვე მომზადებულია ცვლილებები, რომელიც უწყებათშორის საბჭოს უნდა წარედგინოს.
„შემოსულ ტურისტს კოვიდი თუ დაუდასტურდება, ტურისტები უნდა იყვნენ შესაბამისად დაზღვეული, სადაც იქნება კოვიდ დაზღვევის კომპონენტი. შესაბამისმა დაზღვევამ უნდა აანაზღაუროს ეს მკურნალობა. ამაზე ჯანდაცვას წარდგენილი აქვს ცვლილებები შესაბამის დადგენილებებში და ვფიქრობ, ეს დროულად იქნება მიღებული. ანაზღაურების საკითხი მიბმული იქნება იმ სავალდებულო სადაზღვევო კომპონენტზე, რომლითაც აღჭურვილი უნდა იყოს ტურისტი.
ინფიცირების გამოვლენის შემთხვევაში ტურისტი გადავა იზოლაციაში, მათ შორის კოვიდ-სასტუმროში, ხოლო თუ სჭირდება სტაციონარი, სტაციონარში და ა.შ. რაც შეეხება მკურნალობის ანაზღაურებას, ამას უზრუნველყოფს სადაზღვევო კომპონენტი, რომელიც უნდა ჰქონდეს ტურისტს“, - განაცხადა ამირან გამყრელიძემ.
ქართულმა სადაზღვევო კომპანიებმა ჯანდაცვის სამინისტროს უკვე არაერთხელ მიმართეს ტურისტებისთვის სადაზღვევო პაკეტის შეთავაზების საკითხზე, თუმცა როგორც ისინი „კომერსანტთან“ აცხადებდნენ უწყებისგან პასუხს აქამდე ვერ იღებდნენ.
გლობალ ბენეფიტს ჯორჯიას სამეთვალყურეო საბჭოს თავმჯდომარე ნინა კობახიძე „კომერსანტთან“ ყვება, რომ კოვიდ დაზღვევაზე მუშაობის დაწყება, მაშინ როდესაც საზღვრები უკვე დღეს იხსნება, დაგვიანებულია, თუმცა იმედოვნებს რომ ყველაფერი მალე მოგვარდება. მისი თქმით, სადაზღვევოები სავარაუდოდ უკვე დღის ბოლომდე წარუდგენს ჯანდაცვას სადაზღვევო პაკეტებს და შემდეგ უკვე მთავრობაზე იქნება დამოკიდებული თუ როდიდან ჩაეშვება ეს პროდუქტი.
„ტურისტების კოვიდ დაზღვევაზე მუშაობის დაწყება ცოტა დაგვიანებულია, რადგან დღეს უკვე საზღვრები იხსნება. მთავრობა ჩვენგან ელოდება გამზადებულ პროდუქტს, რომელსაც წესით დღესვე წარვუდგენთ, ეს ჩვენ უკვე მზად გვაქვს, უბრალოდ დეტალებს ვაკორექტირებთ. ამ დაზღვევის შემთხვევაში სახელმწიფოსაც აღარ დააწვება ეს ხარჯი, ტურისტიც დაცული იქნება და სადაზღვევო ინდუსტრიისთვისაც საინტერესო ბაზარია.
ჯანდაცვაში სავარაუდო ტურისტული პაკეტები 1 თვის წინ გავაგზავნეთ, სადაც საუბარია, რომ სახელმწიფომ რეგულაციის წესით თქვას, რომ აუცილებელი და სავალდებულოა covid-დაზღვევა, ისევე როგორც PCR-ტესტს ვითხოვთ საზღვარზე. ეს პაკეტები ფარავს, როგორც სასტუმროში მკურნალობის, ასევე სტაციონარში განთავსების ხარჯებს. სადაზღვევო პაკეტების ჯამური ლიმიტი სავარაუდოდ 20-30 ათას ლარამდე ადის, ეს მხოლოდ კოვიდ დაზღვევას ეხება და სრულიად საკმარისია მკურნალობის ხარჯებისთვის, თუმცა არსებობს რისკი სავალალო შემთხვევების დროსაც, სწორედ ამ დეტალებს ვალაგებთ“, - განმარტა ნინო კობახიძემ.
„ჯიპიაი ჰოლდინგის“ კომუნიკაციების დირექტორის, თინათინ სტამბოლიშვილი „კომერსანტთან“ აღნიშნავს, რომ კოვიდ დაზღვევის ირგვლივ კონსულტაციები მიმდინარეობს და უახლოეს დღეებში კონკრეტული დეტალები ცნობილი გახდება.
„აქტიურად დაიწყო კონსულტაციები და უახლოეს დღეებში სავარაუდოდ დაზღვევა უკვე იქნება სადაზღვევო ინდუსტრიისგან, მიმდინარეობს მსჯელობა მოდელზე და პირობებზე, რომ მაქსიმალურად იყოს კომფორტული შემომსვლელი ტურისტისთვის და მაქსიმალურად ხელშემწყობი ტურიზმში ჩართული კომპანიებისთვის ანუ შემომყვანი ტურისტულებისთვისაც. განიხილება ადგილზე შეძენაც, ელექტრონული გაფორმებას, მოკლედ ყველანაირი პირობაა, რომ არ შეფერხდეს აქ შემომსვლელი ტურისტი, რადგან ეს დაზღვევა იქნება კოვიდის მკურნალობის რისკი. ჯანმრთელობის დაზღვევაში რომელიც ტურისტს მოგზაურობისას აქვს, უნდა იყოს დამატებული კოვიდის რისკი. განიხილება აღნიშნული დაზღვევის ტურისტების მიერ როგორც საქართველოში შეძენა, ასევე თავიანთ ქვეყანაში, მთავარია რომ ამ რისკს ფარავდეს და უცხოელი მოქალაქეების ჯანმრთელობაზე პასუხისმგებელი ადგილობრივი ქვეყანა არ აღმოჩნდეს. ყველაფერს ვაკეთებთ რომ ეს საკითხი უახლოეს დღეებში მოგვარდეს“, - ამბობს თინათინ სტამბოლიშვილი.