ყაზახური ბანკები უარს აცხადებენ რუსული კომპანიებისგან რუბლით გადახდების მიღებაზე. ამის შესახებ Forbes-ს „ტოჩკა ბანკის“ FEA Import-ის ხელმძღვანელმა ანა დავიდოვამ განუცხადა. მისი თქმით, ბანკმა დააფიქსირა რუბლში ათობით ჩარიცხვის დაბრუნება Halyk Bank, Fortebank, RBK Bank და Bereke Bank-დან.
„ყაზახურმა ბანკებმა უფრო ხშირად დაიწყეს უარის თქმა რუბლის გადახდაზე, რადგან „ამერიკული ფინანსური ჯარები“ ყაზახეთსა და სომხეთში გააქტიურდნენ, რათა რუბლი არ დაკონვერტირდეს დოლარად და არ მოიაროს მთელი მსოფლიო“, - განაცხადა ალექსანდრე ფაქტოროვმა, MoneyPort კრიპტო-ბირჟის დამფუძნებელმა.
ამ ფონზე, რუსული ბიზნესი სულ უფრო მეტად დაინტერესდა ყაზახეთის ტენგეში გადახდებით. დავიდოვას თქმით, აპრილში მარტთან შედარებით ტენგეში გადახდების რაოდენობა „ტოჩკა ბანკში“ 75%-ით გაიზარდა.
„ყაზახური ბანკები ზოგჯერ უარს ამბობენ ტენგეში გადახდების მიღებაზე, თუ ისინი რუსული კომპანიების მიერ არის განხორციელებული“, - თქვა ალექსეი პოროშინმა, „დელოვაია როსიას“ გენერალური საბჭოს წევრმა და ჯგუფის აღმასრულებელმა დირექტორმა.
„ტრანზაქციის გაყინვა ან დაბრუნება შესაძლებელია ვალუტის მიუხედავად, თუ ტრანზაქცია არ გაივლის ბანკის შიდა კონტროლს და მოხვდება სარისკო კატეგორიაში“, - განმარტა ელდარ ბაბაევმა, Aronov and Partners-ის ყაზახეთში პარტნიორი ოფისის ხელმძღვანელმა.
საკანონმდებლო დონეზე, რუსული კომპანიების მიერ ყაზახეთში გადახდების შეზღუდვა არ ხდება, მაგრამ ბანკების შიდა ინსტრუქციებში შეიძლება იყოს დამატებითი მოთხოვნები მსგავსი შემთხვევებისთვის. ყაზახური ბანკები იძულებულნი არიან დაიცვან დასავლეთის ქვეყნების მიერ დაწესებული სანქციების შეზღუდვები, რადგან შეერთებული შტატები ყაზახეთის ეკონომიკაში მთავარი ინვესტორია.
