აშშ-ის პრეზიდენტმა დონალდ ტრამპმა სომხეთის პრემიერ-მინისტრ ნიკოლ ფაშინიანთან და აზერბაიჯანის პრეზიდენტ ილჰამ ალიევთან ცალ-ცალკე სატელეფონო საუბრები გამართა. მოლაპარაკებები 2025 წლის 8 აგვისტოს ვაშინგტონში გამართული სამშვიდობო სამიტის პირველ წლისთავს დაემთხვა.
სომხეთის მთავრობის ინფორმაციით, ფაშინიანმა ტრამპს მადლობა გადაუხადა ვაშინგტონის სამიტის ორგანიზებისა და სომხეთ-აზერბაიჯანის სამშვიდობო პროცესში შეტანილი წვლილისთვის. მხარეებმა ასევე განიხილეს Trump Route for International Peace and Prosperity-ის, TRIPP-ის მიმდინარე მდგომარეობა და პროექტის მშენებლობის უახლოეს მომავალში დაწყების მზადყოფნა დაადასტურეს.
აზერბაიჯანის პრეზიდენტის ადმინისტრაციის ცნობით, ტრამპმა და ალიევმა განიხილეს რეგიონში მშვიდობისა და სტაბილურობის მდგომარეობა, ასევე სომხეთსა და აზერბაიჯანს შორის ეკონომიკური კავშირების განვითარება. საუბარში აღინიშნა აზერბაიჯანული ნავთობპროდუქტების სომხეთში ექსპორტი, აზერბაიჯანის ტერიტორიის გავლით სომხეთისთვის ტვირთების ტრანზიტი და ორ ქვეყანას შორის სავაჭრო ურთიერთობების დაწყება.
მხარეებმა TRIPP-ის პროექტზეც ისაუბრეს. აზერბაიჯანის პრეზიდენტის ადმინისტრაციის განცხადებით, ქვეყნის ტერიტორიაზე შესაბამისი სატრანსპორტო ინფრასტრუქტურის მშენებლობა დასრულების ეტაპზეა, ხოლო მხარეებმა იმედი გამოთქვეს, რომ პროექტის სომხეთის მონაკვეთზე სამუშაოებიც მალე დაიწყება.
ერთი დღით ადრე ფაშინიანმა და ალიევმაც გამართეს სატელეფონო საუბარი. მათ სამშვიდობო პროცესთან ერთად სავაჭრო და ეკონომიკური კავშირების განვითარება და TRIPP-ის განხორციელება განიხილეს.
2025 წლის 8 აგვისტოს ვაშინგტონში სომხეთმა და აზერბაიჯანმა სამშვიდობო შეთანხმების ტექსტი პარაფირებული ფორმით მიიღეს და ერთობლივ დეკლარაციას მოაწერეს ხელი. შეთანხმებები რეგიონული სატრანსპორტო კავშირების გახსნასაც ითვალისწინებს, მათ შორის TRIPP-ის პროექტის განვითარებას.
წყაროები:
https://president.az/en/articles/view/73230
https://www.reuters.com/world/trump-announces-peace-agreement-between-azerbaijan-armenia-2025-08-08/
https://www.whitehouse.gov/releases/2025/08/president-trump-brokers-another-historic-peace-deal/
